अन्त्येष्टिका लागि घाटमा लगिएको शव प्रहरीले नियन्त्रणमा लियो

काठमाडौं– मोरङमा अन्त्येष्टीका लागि घाटमा लगिएको एक महिलाको शवलाई प्रहरीले नियन्त्रणमा लिएको छ। विराटनगर महानगरपालिका–८ बलुवाइकी २८ वर्षीया प्रेमदेवी शाहको शव जलाउन तयारी भइरहेका बेला बिहीबार  प्रहरीले नियन्त्रणमा लिएको हो।

घाँटीमा शंकास्पद डाम देखिएपछि स्थानीयले दिएको सूचनाका आधारमा घाटबाट शव नियन्त्रणमा लिएको मोरङ प्रहरी प्रमुख प्रहरी उपरीक्षक विश्व अधिकारीले जानकारी दिए।

‘शंकास्पद देखिएपछि घाटबाटै शव नियन्त्रणमा लिएर पोष्टमार्टमका लागि अस्पताल पुर्‍याइएको छ,’ अधिकारीले भने, ‘हत्या हो कि मृत्यु हो भन्ने कुरा पोष्टमार्टम रिपोर्ट आएपछि मात्र खुल्छ।’

प्रहरी उपरीक्षक अधिकारीका अनुसार प्रेमदेवीका पति गोविन्द शाहले उनकी श्रीमती बेलुकी सँगै सुतेको र बिहान उठ्दा भुइँमा मृत अवस्थामा  भेटिएको बताएका छन्। शाहले प्रेमदेवीले केही महिना पहिले आत्महत्याको प्रयास गरेकाले घाँटीमा  डाम लागेको समेत दाबी गरेका छन्। 

प्रहरीले गोविन्दलाई नियन्त्रणमा लिएको छ। प्रेमदेवीको मृत्यु भएको भनेर बिहान साढे ५ बजे उनका माइती पक्षलाई खबर पुगेको मृतकका दाजु राजु शाहले बताए।

१२ वर्षअघि बिहे भएका उनीहरुका दुई सन्तान छन्।