टुँडिखेलमा आजदेखि पार्किङ बन्द, कहिले हट्छ अन्य अतिक्रमण ?

काठमाडौँ- राजधानीको टुँडिखेलमा आज (माघ १ गते)देखि पार्किङ बन्द गरिएको छ ।

टुँडिखेल बचाउँ अभियानका अभियन्ताहरूको मागबमोजिम आजबाट पार्किङ बन्द गरिएको काठमाडौँ महानगरपालिका वडा २८ का अध्यक्ष भाइराम खड्गीले जानकारी दिए ।

विभिन्न सामाग्री राखेर गरिएको अतिक्रमण पनि क्रमश हटाउने उनले बताए । बसपार्क, फुटपाथ ब्यापार र पार्किङले खुलामञ्च अतिक्रमण गरेको भन्दै अभियान्ताहरुले यो तत्काल हटाउन माग गरेका थिए ।

दुई दशकअघिसम्म राजनीतिक, सांस्कृतिक, सामाजिक गतिविधिका लागि प्रयोग हुँदै आएको टुँडिखेल (खुलामञ्च) अनधिकृत अतिक्रमणको चपेटामा परेको छ ।

मानव अतिक्रमणमा परेको टुँडिखेलको स्वतन्त्रताका लागि नागरिकस्तरमा अभियानको थालनी भएको छ । ‘‘अकुपाई टुँडिखेल’’ भन्दै कात्तिक २३ गते विशाल मानव साङ्गलोले टुँडिखेल घेरा हालेको थियो ।

हरेक शनिबार जनचेतनामूलक गतिविधि गर्दै आएका अभियन्ताहरूलाई साथ दिँदै काठमाडौँ महानगरपालिका वडा नम्बर २८ ले माघ १ गतेदेखि टुँडिखेलमा पार्किङ निषेधभन्दै ब्यानर टाँगेको छ । जनतादेखि जनप्रतिनिधिसम्म अभियानसमेत अभियन्ताले सञ्चालन गरेका छन् ।

टुँडिखेलभित्र अस्थायी बसपार्क, पार्किङ, व्यापारिक टहरा, भ्युटावर निर्माण सामग्री थुप्रिएका छन् । अकुपाई टुँडिखेलका संयोजक विजय श्रेष्ठका अनुसार त्रिपुरेश्वरदेखि रानीपोखरीसम्म फैलिएको टुँडिखेलमा स्थायी रूपमै १३ स्थान मिचिएका छन् ।

टुँडिखेलको ऐतिहासिक र राजनीतिक पृष्ठभूमि मात्र नभएर सांस्कृतिक पर्व, जात्रा र सम्पदासँग समेत गाँसिएको स्थानीय बताउँछन् ।