दैलेख - दुई नाबालक छोराहरुलाई विष खुवाएर हत्या गरेको आरोपमा आमालाई जन्मकैदको फैसला सुनाइएको छ। दैलेखको महाबु गाउँपालिका-१ खरिगैराकी २४ वर्षीया कल्पना नेपालीलाई दैलेख जिल्ला अदालतले जन्मकैद फैसला सुनाएको हो।
विसं २०७५ कात्तिक १० गते दिउँसो भुटेको भातमा मेटासिड घोलेर खुवाएपछि उपचारको लागि सदरमुकाम ल्याउँदै गर्दा सात वर्षीय छोरा आयुष नेपालीको बाटोमै र तीन वर्षीय छोरा अमित नेपालीको उपचारका क्रममा ज्यान गएको थियो। जिल्ला प्रहरी कार्यालय दैलेखमा कात्तिक १६ गते ज्यानसम्बन्धी कसुरमा जाहेरी दर्ता भएको थियो। कल्पनालाई प्रहरीले २०७५ कात्तिक २० गते हिरासत अनुसन्धान सकेर दैलेख जिल्ला अदालतमा मङ्सिर १० गते पेश गरेको थियो। त्यही दिन अदालतले कल्पनालाई पुर्पक्षका लागि जिल्ला कारागारमा थुनामा पठाएको थियो।
कल्पनाले आफ्नो श्रीमान् गाउँबाट बिहानै रक्सी खाएर आएको विषयमा सामान्य विवाद भएको झोकमा तीन वटै छोरालाई भुटेको भातमा मेटासिड घोलेर खुवाए पनि ५ वर्षीय माइलो छोरा अमृतले भने नराम्रो गन्ध आएको भन्दै खाने कुरा खाएका थिएनन्।