सल्यानका ३९ गाउँमा प्रहरीको नियमित गस्ती

सुर्खेत । सल्यानका विभिन्न ३९ वटा गाउँमा प्रहरीले अबदेखि नियमित गस्ती गर्ने भएको छ । दुर्गमबस्ती हुने अपराध नियन्त्रण र जनतासँगको सम्बन्ध समधुर बनाउन प्रहरीले नियमित गस्ती गर्ने भएको हो ।

प्रहरीले जिल्लाका पानचौर, दार्मकोट, वाफुखोला,गुरुदासे, गर्चे, अवलवेसी, घुइयाबारी, जलजला र छरछरे लगायतका ३९ बस्तीमा गस्ती गर्ने छ । ‘जनतालाई शान्ति सुरक्षाको अनुभूति गराउन र अपराध नियन्त्रणका लागि अभियान सुरु गरेका छौं’ सल्यानका डिएसपी ढकेन्द्र खतिवडाले भने, ‘नियमित गस्तीले फरार अपराधीहरु खोज्न र जनतासँगको समन्ध बलियो बनाउन सहयोग मिल्नेछ ।’

गस्तीका लागि प्रहरीले जिल्लाका ३९ वटा दुर्गम बस्तीहरु छनौट गरेको छ । प्रहरी चौकीबाट दुईदेखि आठ घण्टासम्मको पैदल दूरीलाई दुर्गमबस्ती मानेर गस्तीका लागि छनौट गरिएको हो । अबदेखि छनौट गरिएका बस्तीमा हप्तामा एक पटक प्रहरीले गस्ती गर्नेछ । गस्तीमा पुग्ने प्रहरीले स्थानीय र जनप्रतिनिधिहरुसँग छलफल तथा अन्तरक्रिया गरेर फर्कने छ ।

स्थानीय र जनप्रतिनिधिहरुसँग गरिएको छलफलको समेत तस्विर प्रहरीले खिचेर ल्याउने छ । प्रहरी गस्तीमा गएको हो या होइन भनेर प्रमाणका लागि सम्बन्धित बस्तीको तस्विर अनिवार्य रुपमा जिल्लामा पेश गर्नुपर्नेछ ।