शुक्रबार, चैत २८, २०७६

समाचार विशेष

६ देशमा कोरोनाको नयाँ संक्रमण उच्च, एकै दिनमा १ हजार ४ सयभन्दा बढीको मृत्यु

1584510296corona-death-ns.jpg

वासिंटन– कोरोना भाइरस (कोभिड–१९)को मुख्यभूमि मानिएको चीनमा नयाँ संक्रमण नगन्यजस्तै देखिँदा अन्य देशमा भने फैलने क्रम तीव्र छ।

विश्वका १९२ देश तथा टेरिटोरी (क्षेत्र)मा कोरोना संक्रमण देखिएको भए पनि ६ देशमा भने तीव्ररूपमा फैलिरहेको छ।

वर्ल्डओमिटरडटइन्फोका अनुसार पछिल्लो २४ घन्टामा अमेरिका, इटाली, स्पेन, जर्मनी, फ्रान्स र इरानमा २३ हजार दुई सय ६८ जनामा नयाँ संक्रमण देखिएको छ, जुन कुल नयाँ संक्रमणको ७१.८० प्रतिशत हो। उक्त अवधिमा कुल नयाँ संक्रमितको संख्या ३२ हजार चार सय ६ रहेको छ।

नयाँ संक्रमण पुष्टि भएकामध्ये अमेरिकाका सबैभन्दा बढी छन्। त्यहाँ नौ हजार तीन सय ३९ जनामा नयाँ संक्रमण देखिएको छ। त्यसपछि क्रमशः इटाली, स्पेन, जर्मनी, फ्रान्स र इरान दोस्रोबाट छैटौंमा छन्। वर्ल्डओमिटरडटइन्फोका अनुसार इटालीमा पाँच हजार पाँच सय ६०, स्पेनमा तीन हजार दुई सय ७२, जर्मनीमा दुई हजार पाँच सय नौ, फ्रान्समा एक हजार पाँच सय ५९ र इरानमा एक हजार २९ जनामा नयाँ संक्रमण पुष्टि भएको छ।

संक्रमण देखिएका आधारमा भने चीन सबैभन्दा अगाडि छ। त्यहाँ ८१ हजार ३९ जनामा संक्रमण पुष्टि भएको छ। त्यसपछि क्रमशः इटाली, अमेरिका, स्पेन, जर्मनी, इरान र फ्रान्स दोस्रोबाट छैटौं छन्। इटालीमा ५९ हजार एक सय ३८, अमेरिकामा ३३ हजार पाँच सय ४६, स्पेनमा २८ हजार सात सय ६८, जर्मनीमा २४ हजार आठ सय ७३, इरानमा २१ हजार ६ सय ३८ र फ्रान्समा १६ हजार १८ जनामा संक्रमण पुष्टि भएको छ।

ज्यान गुमाउने पनि धेरै

यी देशमा कोरोना संक्रमणबाट ज्यान गुमाउने पनि धेरै छन्। वर्ल्डओमिटरडटइन्फोका अनुसार यी देशमा पछिल्लो २४ घन्टामा एक हजार चार सय १० जनाले कोरोना संक्रमणबाट ज्यान गुमाएका छन्, जुन कुल ज्यान गुमाउनेको ८६.२९ प्रतिशत हो। उक्त अवधिमा एक हजार ६ सय ३४ जनाले ज्यान गुमाएका थिए।

पछिल्लो २४ घन्टामा इटालीमा ६ सय ५१, अमेरिकामा एक सय १७, स्पेनमा तीन सय ९१, जर्मनीमा १०, इरानमा एक सय २९ र फ्रान्समा एक सय १२ जनाले ज्यान गुमाएका छन्।

विश्वभर कोरोना संक्रमणबाट ज्यान गुमाउनेमध्ये यी देशमा मात्रै ७० प्रतिशत छन्। विश्वभर कोरोना संक्रमणबाट १४ हजार ६ सय ४७ जनाले ज्यान गुमाउँदा यी देशमा त्यो संख्या १० हजार एक सय २० रहेको छ।

प्रतिक्रिया दिनुहोस्