शनिबार, असार २०, २०७७

समाज

बढी भाडा उठाउने २० जना पक्राउ

1584796847buspark.jpg
फाइल तस्बिर

काठमाडौं- यात्रुबाट बढी भाडा उठाउने २० जनालाई प्रहरीले राजधानीका बिभिन्न स्थानबाट पक्राउ गरेको छ।

उपत्यकाबाहिर जाने यात्रुहरूबाट बढी भाडा असुल्ने २० जनालाई ट्राफिक प्रहरी आफै यात्रु बनेर आइतबार पक्राउ गरेको महानगरीय ट्राफिक महाशाखाले जनाएको छ।

पक्राउ पर्नेहरूमा रूपेश कार्की, सन्तोष श्रेष्ठ, गोविन्द बुढाथोकी, देविन्द्र कार्की, कमल गुरुङ, लाल बहादुर भुजेल, रोशन राणा कुवँर, कृष्ण पराजुली, पारस गौतम, सुरेश क्षेत्री, संजय उप्रेती, तिलक लामा, गौतम तामाङ, मानसिंह रूम्वा, कर्ण थिङ, आकाश लामा, सुदर्शन रसाईली, शुक्र लामा, दिनेश शाह र जयन्द्र कुमार शाही रहेका छन्।

उनीहरुलाई नयाँ बसपार्क, कोटेश्वर, बल्खु, चावहिल र गौशाला स्थानबाट पक्राउ गरिएको महाशाखा प्रमूख एसएसपी भीमप्रसाद ढकालले जानकारी दिए।

पक्राउ पर्नेहरूले गाडी चढ्नुअघि कतिपय यात्रुलाई कन्भिन्स गरेर पैसा ठग्ने गरेको, एउटै टिकट २ जनालाई बेच्ने गरेको र कतिपयलाई बढी भाडा नतिरे नलैजाने गरेको पाइएकोले पक्राउ गरिएको ढकालले बताए।

महाशाखाले बढी भाडा असुल्ने १७ जनालाई ८ गते र ९ जनालाई ७ गते पक्राउ गरि आवश्यक कारवाहीको लागि विभिन्न प्रहरी वृत्तहरूमा बुझाईसकेको जनाएको छ।

प्रतिक्रिया दिनुहोस्