काठमाडौं – विदेश पठाइदिन्छु भन्दै शिष्यलाई ठगी गरेको आरोपमा शिवानन्द स्वामी भनिने दिपक भण्डारीलाई प्रहरीले पक्राउ गरेको छ। महानगरीय अपराध अनुसन्धान महाशाखा टेकुको टोलीले भण्डारीलाई सितापाइलाबाट सोमबार पक्राउ गरेको हो।
महाशाखाका प्रमुख एसएसपी सहकुलबहादुर थापाले भण्डारीले चेक रिपब्लिक पठाइदिने भन्दै ठगी गरेको उजुरी परेको छ। विदेश पठाइदिन्छु भनेर चार जनाबाट ४० लाख जति ठगी गरेको खुलेको थापाले जानकारी दिए।
‘प्रारम्भिक अनुसन्धानबाट भण्डारीले अरुलाई पनि ठगी गरेको हुन सक्ने देखिन्छ’ थापाले भने, ‘पक्राउ परेपछि पीडितको संख्या बढ्छ।’
भण्डारीको चेक रिपब्लिक देशमा पठाउनलाई कुनै सम्बन्ध नदेखिएको थापाले बताए। भण्डारी आफू तन्त्रविद्याको विज्ञ भएको बताउँदै आएका छन्।