आइतबार, चैत १६, २०७६

समाचार विदेश

कोरोना महामारीबीच भूकम्पले हल्लियो क्रोएसिया

कोरोना महामारीबीच भूकम्पले हल्लियो क्रोएसिया

एजेन्सी- क्रोयसियामा आइतबार शक्तिशाली भूकम्प गएको छ।

भूकम्पका कारण राजधानी जाग्रेबमा थुप्रै घरहरु भत्किएको र सवारी साधनमा क्षति पुगेको जनाइएको छ।

केही ठाउँमा आगलागीसमेत भएको अधिकारीहरुले जनाएका छन्।

भूकम्पलगत्तै त्यहाँको आगलागी एवम् विपत व्यवस्थापन क्षेत्रका कर्मचारीहरु राहत र उद्धारमा जुटेका छन्।

भूकम्पमा एक १५ वर्षीय किशोर गम्भीर घाइते भएको र अन्य मानवीय हताहतीको विवरण आइनसकेको जनाइएको छ।

जर्मनीको जर्मन रिसर्च सेन्टर फर जिओसाइन्सेसले पश्चिम बालकान्स क्षेत्रलाई केन्द्रविन्दु बनाएर झण्डै ६ म्याग्नीच्युडको भूकम्पको गएको जनाएको छ।

भूकम्पको धक्का १० सेकेन्डसम्म महसुस गरिएको थियो।

आन्तरिक मन्त्री डाभोर बोजिनोभिकले ट्वीटरमार्फत एक सन्देश दिँदै नआत्तिन र सामाजिक दूरी कायम राख्न अपिल गरेका छन्।

कोरोना भाइरससँग लडिरहेको युरोपेली देश क्रोयसियामा भूकम्पले अर्को समस्या निम्त्याएको हो।

त्यहाँ हालसम्म २ सय ६ जनामा कोरोना भाइरसको संक्रमण पुष्टि भएको छ भने १ जनाको मृत्यु भएको छ।

प्रतिक्रिया दिनुहोस्