भैरहवा– राष्ट्रिय एकता दिवस आइतबार भैरहवामा पनि विविध कार्यक्रम गरी मनाइएको छ । ३ वर्षअघि नेपाल भारत सीमा क्षेत्र सिद्धार्थनगर नगरपालिका–२ मा पृथ्वी पार्क निर्माण गर्ने र त्यसमा पृथ्वीनारयण शाहको सालिक राख्नेगरी बनेको समितिले भैरहवामा विभिन्न संघसंस्थाको सहभागितामा कार्यक्रम गरेको हो ।
विद्रोही चोकमा आयोजित सभामा नेकपाका नेता भरतकुमार पोखरेलले मुलुकको माटोले डोर्याउँदै पृथ्वी जयन्ती तथा राष्ट्रिय एकता दिवसको कार्यक्रममा स्वतःस्फूर्त रुपमा भएको सहभागिताले आफूलाई खुसी बनाएको बताए ।
अवसरमा सस्कृतिविद् प्रा.डा. गितु गिरिले कुनै पनि वंश स्वाभावैले नराम्रो नहुने बताउँदै एकाध जनाले गरेको गल्तीलाई लिएर पूरै वंशको विरोध गर्नु गलत संस्कार भएको बताए । लुम्बिनी बौद्ध विश्वविद्यालयका अनुसन्धान विभाग प्रमुख समेत रहेका डा. गिरिले टुक्रे राज्यहरुको एकीकरण गरेर तत्कालिन समयमा पृथ्वीनारयण शाहले गरेको नेपाल एकीकरणले नै नेपाल राज्य भएको तर्क गरे ।