धनुषा– प्रहरीले धनुषाको मिथिला नगरपालिका–५ श्रीपुरका २४ वर्षीय ओमप्रकाश महतो (दिलीप) हत्याका आरोपितविरुद्ध कर्तव्य ज्यान मुद्दा चलाउने तयारी गरेको छ।
हत्या आरोपमा पक्राउ परेका चार जनाले ओमप्रकाशको हत्या गरेको अनुसन्धानबाट खुलेपछि प्रहरीले उनीहरूविरुद्ध कर्तव्य ज्यान मुद्दा चलाउने तयारी गरेको हो।
प्रहरीका अनुसार घटनाका मुख्य योजनाकार क्रसर सञ्चालक मिथिला नगरपालिका–५ का २७ वर्षीय विपिन रहेको बस्नेत छन्। यस्तै, हत्यामा टिपर चालक महोतरी बर्दिबास–९ का ३७ वर्षीय मुनिन्द्र महतो, अनटेस्ट लोडर चालक बर्दिबास नगरपालिका–२ का २४ वर्षीय जितेन्द्र महतो र मिथिला नगरपालिका–५ का २७ वर्षीय रोशनकुमार यादवले सहयोगी भूमिका निभाएको प्रहरीले जनाएको छ।
जिल्ला प्रहरी कार्यालय, धनुषाका अनुसार आरोपितले ओमप्रकाशलाई नियन्त्रणमा लिएर टिपरले किचेर हत्या गरेको प्रहरीसमक्ष स्वीकार गरेका छन्। उनीमाथि ना७प ६४१३ नम्बर टिपर चढाइएको प्रहरीले जनाएको छ।
गत शुक्रबार बिहान औरही खोलामा भइरहेको अवैध उत्खनन रोक्न गएका ओमप्रकाशको टिपरले किचेर हत्या गरिएको थियो।
ओमप्रकाशले श्रीपुरस्थित औरही खोलामा भइरहेको अवैध उत्खनन रोक्न अभियान चलाएका थिए। उनले खोलाको डिलमा अवैधानिकरूपमा सञ्चालित चुरियामाई बालुवा प्रशोधन उद्योग (क्रसर)को समेत विरोध गरेका थिए।
मृतकका परिवारले आरोपित चारै जनाविरुद्ध कर्तव्य ज्यान मुद्दामा जिल्ला प्रहरी कार्यालय, धनुषामा किटानी जाहेरी दर्ता गराएका छन्।