काठमाडौं- राजधानीमा जारी शहीद स्मारक ए डिभिजन लिग फुटबल प्रतियोगितामा फ्रेण्डस क्लबले थ्री स्टार क्लबलाई पराजित गरेको छ।
त्रिपुरेश्वरस्थित दशरथ रङ्गशालामा आज भएको खेलमा फ्रेन्ड्स क्लबले थ्री स्टार क्लबलाई १–० गोल अन्तरले पराजित गर्दै विजयी भएको हो।
फ्रेन्ड्सको यो पहिलो जित हो। फ्रेन्ड्सको जितमा ब्राजिलियन खेलाडी वाग्नेर डी कार्मोले निर्णायक गोल गरे।
उनले खेलको १३औँ मिनेटमा विश्व अधिकारीको फ्रिकिक बलमा गरेको एक गोल नै फ्रेन्ड्सका लागि निर्णायक गोल सावित भयो।
फ्रेन्ड्ससँग पराजित भएसँगै थ्री स्टारले लिगको दोस्रो स्थानमा उक्लने मौका गुमायो। थ्री स्टारले ६ खेलमा १० अङ्क जोडेको छ। थ्री स्टार लिगको चौथो स्थानमा रहेको छ।
अघिल्ला पाँच खेलमा तीन बराबरी र दुई हार व्यहोरेको फ्रेन्ड्सले पाँच अङ्क जोडेको छ। फ्रेन्ड्स लिगको ११औँ स्थानमा उक्लिएको छ।