आइतबार, चैत १६, २०७६

समाचार

मास्क र स्यानिटाइजर कालोबजारी गर्ने चार पक्राउ

मास्क र स्यानिटाइजर कालोबजारी गर्ने चार पक्राउ

जनकपुरधाम– कोरोना भाइरस संक्रमणको त्रास फैलिरहेको बेला मास्क र स्यानिटाइजर कालोबजारी गर्ने चारजना जनकपुरबाट पक्राउ परेका छन् । जिल्ला प्रशासन कार्यालय र जिल्ला प्रहरी कार्यालयको संयुक्त टोलीले उनीहरुलाई पक्राउ गरेको हो ।

कोरोना संक्रमणको मौका छोपेर उपभोक्तासँग तोकिएको भन्दा बढी मूल्य लिएर बिक्री गरिरहेको अवस्थामा उनीहरुलाई पक्राउ गरिएको जिल्ला प्रहरी कार्यालय धनुषाले जनाएको छ ।

अनगुमनको क्रममा जनकपुरधाम–४ स्थित सुस्मिता मेडिकल हलबाट सर्लाही बरहथवा–८ बस्ने संयज साह, जनकपुरधाम–८ स्थित भ्रमरपुरा चोकस्थित अटल फार्मेसीबाट धनुषा लक्ष्मिनिया–३ का अनिल यादव र जलेश्वर–६ का प्रभन्स चौधरी र जनकपुरधाम–४ स्थित सम्पूर्ण मेडिकलबाट स्थानीय संजय साहलाई पक्राउ गरिएको जिल्ला प्रहरी कार्यालयका प्रवक्ता डीएसपी रामेश्वर कार्कीले जानकारी दिए ।

मास्क कालोबजारी गरिरहेको अवस्थामा पक्राउ गरिएका चारै जनाविरुद्ध कालोबजार मुद्दा चलाउने तयारी भइरहेको उनले बताएका छन् ।

कोरोना संक्रमणको त्रास फैलिएयता जनकपुरमा मास्क र स्यानिटाइजरको व्यापक अभाव भएको छ । जनकपुरको अधिकांश औषधि बिक्रेताहरु मास्क र स्यानिटाइजर सकिएको भन्दै उपभोक्ताहरुलाई बताउँदै आइरहेका छन् ।

प्रतिक्रिया दिनुहोस्