अस्ट्रेलियामा गएको सेप्टेम्बरदेखि लागेको आगलागी अझै नियन्त्रणमा आएको छैन ।
दक्षिण–पर्वी अस्ट्रेलियाको आकाशको रंग रगतको जस्तो देखिएको र आगो झन् भयावह बन्दै गएको बीबीसीले जनाएको छ । आगलागीकै बीच त्यहाँ नयाँ वर्ष २०२० मनाइयो ।
आगलागीमा अहिलेसम्म २८ जनाको ज्यान गइसकेको छ । कम्तीमा दुई हजार घर खरानी भइसकेका छन् । आगलागीमा लाखौं जंगली जनावर मरिसकेको बताइएको छ। तीव्र हावाका कारण आगलागी झन् फैलिरहेको छ।
अस्ट्रेलियाको तापक्रमले सारा रेकर्ड तोडिसकेको छ । यो महिना सिड्नीको तापक्रम ४९ डिग्री पुगेको छ ।
यसैबीच, अस्ट्रेलियाका प्रधानमन्त्री स्कट मरिसनले माफी मागेका छन् । देशमा आगलागी भइरहेको बेला छुट्टीमा गएको भन्दै उनको आलोचना भएको थियो। तीव्र आलोचना भएपछि उनी बीचमै फर्केका थिए।