बुधबार, चैत १९, २०७६

समाज

नयाँ बसपार्कमा चालक, यात्रु र कर्मचारीलाई मास्क वितरण

नयाँ बसपार्कमा चालक, यात्रु र कर्मचारीलाई मास्क वितरण
बसपार्क : फाइल तस्बिर

काठमाडौं- कोभिड–१९ को जोखिमलाई ध्यानमा राखेर गोँगबुस्थित नयाँबसपार्कमा मास्क वितरण गरिएको छ।

यातायात व्यवस्था विभाग, ट्राफिक प्रहरी र नेपाल यातायात व्यवसायी राष्ट्रिय महासंघले शनिबार चालक, सहचालक, बसपार्कभित्र कार्यरत कर्मचारी र यात्रुलाई मास्क वितरण गरेका हुन्।

नेपाल प्रहरीले विभिन्न कालोबजारी गरेका व्यापारीबाट जफत गरेर ल्याएको मास्क यातायात व्यवस्था विभागले खरिद गरेर वितरण गरेको जनाइएको छ।

विभागका प्रवक्ता तीर्थराज खनाल एक लाख माक्स खरिद गरेर ल्याएको र आजमात्र नयाँ बसपार्कबाट पाँच हजार थान मास्क वितरण गरेको जानकारी दिए।

महासंघका महासचिव सरोज सिटौला चालक, सहचालक र यात्रुलाई कोरोना संक्रमणबाट जोगिनका लागि थोरै भए पनि सहयोग पुग्ने उद्देश्यले मास्क वितरण गरिएको जानकारी दिए।

‘यातायात मजदूर र यातायात व्यवसायीको सक्रियतामा सरकारसँग सहकार्य गरी ल्याएको मास्क कर्मचारी, चालक, सहचालक र यात्रुमा वितरण गरेका हौँ’, उनले भने।

महासचिव सिटौला सबै प्रदेशमा सरकारसँगको सहकार्यमा चालक र सहचालकलाई मास्क वितरण गर्नेबारे यातायात व्यवसायी छलफलमा रहेको जानकारी दिए।

महानगरीय ट्राफिक प्रहरी वृत्त नयाँ बसपार्कका प्रमुख, प्रहरी निरीक्षक शंकर श्रेष्ठले माक्स नलाउने चालक, सहचालक र यात्रुलाई मास्क वितरण गरिएको जानकारी दिए।

यसअघि शुक्रबार नयाँबसपार्कमा कोरोना परीक्षणका लागि सहायता कक्ष ‘हेल्थ डेक्स’ स्थापना गरिएको थियो। रासस

प्रतिक्रिया दिनुहोस्