काठमाडौं- पूर्व स्वास्थ्य मन्त्री एवम् नेपाली कांग्रेसका नेता गगन थापाले सत्तारुढ नेकपाको कारण संसद बन्धक भएको आक्रोश पोखेका छन्। नेता थापाले नेकपाभित्रको स्वार्थको बेमेलको बन्धक संसदलाई बनाउनु निन्दनीय रहेको बताए।
आइतबार सामाजिक सञ्जाल ट्वीटरमार्फत् नेता थापाले अहिले भइरहेको काम संसदीय अभ्यास र गरिमाको मात्र होइन, संविधानले प्रबन्ध गरेको शक्ति सन्तुलन र नियन्त्रणको खिलाफमा रहेको बताएका छन्।
ट्वीटरमा उनले लेखेका छन्, ‘उपसभामुखज्यू, संसद कुनै दलको छाया होइन, तपाईँ संसदको उपसभामुख हो, नियमअनुसार सदनको प्रकृया अगाडि बढाइयोस्।’
नेकपाले सभामुख उम्मेदवार चयन गर्न नसकेका कारण संसद बन्धक जस्तो भएको अवस्थामा प्रमुख प्रतिपक्षी दल कांग्रेसका सांसद थापाले यस्तो आक्रोश व्यक्त गरेका हुन्।
यसअघि गत पुस १६ गते स्थगित गरिएको संसद आइतबार (पुस २७) लाई बोलाइएको थियो।
आइतबार पनि नेकपाले उम्मेदवारको नाम टुंगो लगाउन नसकेपछि संसद बैठक स्थगित भएको छ।
संवैधानिक व्यवस्थाअनुसार प्रतिनिधिसभाको सभामुख र उपसभामुख फरक राजनीतिक दल र फरक लिंगको हुनुपर्छ।
नेकपाले एकातिर उम्मेदवारको टुंगो लगाउन सकेको छैन भने अर्कोतर्फ उपसभामुख शिवमाया तुम्बाहाङफेले राजीनामा दिएकी छैनन्।
संसद सूचारु हुनासाथ सभामुख निर्वाचनको कार्यतालिका आउने र यही अवस्थामा सभामुख निर्वाचनको कार्यतालिका आए नेकपाले सभामुख पद गुमाउने अवस्था छ।
जसका कारण लामो समयदेखि संसद बैठक अन्यौलमा पर्दै आएको छ।
नेकपाभित्रको स्वार्थको वेमेलको बन्धक संसदलाई बनाउनु निन्दनीय छ।यो संसदीय अभ्यास र गरिमाको मात्र होइन संविधानले प्रवन्ध गरेको शक्ति सन्तुलन र नियन्त्रणको समेत खिलापमा छ। उपसभामुखज्यू,संसद कुनै दलको छायाँ होइन,तपाईं संसदको उपसभामुख हो,नियमानुसार सदनको प्रकृया अगाडी बढाइयोस्।
— Gagan Thapa (@thapagk) January 12, 2020