हेटौंडा- प्रदेश नम्बर ३ को नाम र राजधानी आज (आइतबार) औपचारिक रुपमा प्रदेश सभाबाट तोकिने भएको छ।
शनिबार दर्ता भएको प्रस्तावमाथि अहिले प्रदेशसभामा मतदान हुँदैछ । प्रदेशको नाम वाग्मती र राजधानी हेटौँडा कायम गर्न सत्तारुढ नेकपा र विपक्षी दल कांग्रेस सहमत छन् ।
राजधानीको विषयमा दुईवटा प्रस्ताव प्रदेश सभामा दर्ता भएका छन्। सत्तापक्ष र प्रतिपक्षले हेटौँडा र विवेकशील र साझा पार्टीले धुलिखेल राजधानी तोक्न छुट्टाछुट्टै प्रस्ताव दर्ता गरेका हुन्।
प्रदेश ३ को नामका लागि भने एउटै प्रस्ताव दर्ता भएको छ। नाम ‘बागमती’ मा सबैको सहमति जुटेको छ।
आजकाे बैठकमा मुख्यमन्त्री डोरमणि पौडेलले प्रदेश नं ३ को राजधानी हेटौँडा राख्ने सम्बन्धमा प्रस्तुत प्रस्तावमाथि प्रदेशसभाका सदस्यले उठाएको जिज्ञासावारेमा जवाफ दिने कार्यसूची रहेको नेकपा संसदीय दलका प्रमुख सचेतक रामेश्वर फुयाँलले जानकारी दिए।
उक्त प्रस्तावका प्रस्तावक मुख्यमन्त्री पौडेल र समर्थक प्रमुख प्रतिपक्षी नेपाली काँग्रेस संसदीय दलका नेता इन्द्रबहादुर बानियाँ रहेका छन्।
नेकपा र काङ्ग्रेसका सांसदले ’फ्लोर क्रस’ नगरेमा दुई तिहाइभन्दा पनि बढी मतले हेटौँडा र राजधानी पारित हुने अवस्था छ । दुवै दलमा हेटौँडा र वाग्मती हुँदैन भन्दै असन्तुष्टि जनाए पनि प्रस्ताव दर्ता र पेस गर्दा सबैले समर्थन गरेका छन् ।
प्रदेशसभामा कूल ११० सदस्यमध्ये नेकपाको ८०, नेपाली काँग्रेसको २२, विवेकशील साझा पार्टीको तीन, नेपाल मजदूर पार्टीको दुई, राप्रपा संयुक्तको एक, राप्रपाको एक र एक जना स्वतन्त्र छन्।