काठमाडौं- मूलपानी तेक्वान्दो डोजाङका भिजन तामाङले १०औं कोरियन एम्बासडर राष्ट्रिय खुला भर्चुअल पुम्से तेक्वान्दो प्रतियोगिताको पुरुष एकल १२-१४ वर्षमा स्वर्ण जितेका छन्। शनिबार भएको प्रतियोगितामा स्वर्ण जितेका भिजनले ६.०४ अंक जोडे भने ५.९९ अंकसाथ गोदावरी इन्टरनेसनलका साइरस थापा दोश्रो भएका हुन्। मूलपानीका महेश आङथुपु र सुपरस्टारका कृष पाण्डे तेश्रो बने।
नेपालस्थित दक्षिण कोरियाली राजदूतावासको सहयोगमा नेपाल तेक्वान्दो संघद्वारा आयोजित प्रतियोगिताको युगलतर्फ १५-१७ वर्ष उमेर समूहमा गोदावरीका सृजल श्रेष्ठ र रोशनी सिलवाल (६.५९ अंक)ले स्वर्ण जिते भने चन्द्रसूर्यका यज्ञ राई र हिमाल अधिकारी (६.११ अंक)ले रजत जिते।
युगलतर्फ १८–३५ वर्ष उमेर समूहमा १३औं सागका काँस्य विजेता जितबहादुर बोट र स्वर्णधारी पार्वती गुरुङ पहिलो बने। नेपाल प्रहरीका उनीहरुले ७.२३ अंक जोडे। ७.१४ अंकका साथ १३औं सागकी स्वर्ण विजेता निशा दर्नाल र १३औँ सागका काँस्य विजेता अस्मिन राउत दोश्रो भए ।
१३औँ सागका स्वर्ण विजेताद्वय नेपाली सेनाका आयेशा शाक्य र सञ्जीवकुमार ओझा तथा सेनाकै १३औं सागकी स्वर्णधारी सन्जिला तिमल्सिना र रजत विजेता कृष्णबहादुर तामाङले तेश्रो स्थानमा चित्त बुझाए।
पुरुष ३६-५० वर्षको एकल पुम्सेमा मूलपानीका मधुसुदन सापकोटा (६.२९ अंक)ले स्वर्ण तथा मूलपानीकै प्रेमकुमार दर्नाल (५.९३ अंक) ले रजत चुमे। प्रहरीका लक्ष्मणबहादुर ऐर तथा शिवपुरीधामका आशिष चन्दले काँस्य हात पारे।