ओमप्रकाशको मृत्युपछि गाउँ नै शोकमा

जनकपुरधाम– राति १० बजेसम्म घरमै रहेका धनुषाका ओमप्रकाश महतो शुक्रबार बिहान खोला किनारमा मृतअवस्थामा फेला परेपछि दाइ उपेन्द्रको आँखाको आँशु थामिएको छैन।

भारतको मध्य प्रदेशस्थित भोपालमा इन्जिनिरिङ पढिरहेका २४ वर्षीय दीलिप भनिने ओमप्रकाश केही दिनको विदामा घर आएका बेला शुक्रबार बिहान मृतअवस्थामा फेला परेका थिए। प्रहरीका अनुसार उनलाई टिप्परले किचेको थियो। तर, परिवार भने यसलाई दुर्घटना मान्न तयार छैन।

धनुषाको मिथिलानगरपालिका–५ श्रीपुरस्थित घरबाट करिब ५०० मिटरको दुरीमा उनको शव गाडीले किचेको अवस्थामा फेला परेका थियो।

ओमप्रकाश दश दिनअघि मात्रै घर आएका थिए। पढाई सकिन ६ महिना बाँकी थियो । उनको मृत्युपछि अहिले गाउँनै शोकमग्न भएको छ ।

छोराको मत्युपछि ओमप्रकाशका बाबु–आमा बेहोस जस्तै अवस्थामा छन्। भेट्न आउनेसँग ओमप्रकाशका काकाका छोरा उपेन्द्रले कुरा गर्छन्।

उपेन्द्र भन्छन्, “सानैदेखि ऊ पढाइमा अब्बल थियो, गलत काम कहिल्यै गरेन, अरु कसैले गलत गरेको देखे पनि विरोध गरिहाल्थ्यो। यही बानीले उसको ज्यान गयो।”

उपेन्द्रका अनुसार घर आएको भोलिपल्टै ओमप्रकाश खोलातर्फ गएका थिए। खोलाबाट जथाभावी बालुवा गिट्टी निकालिरहेका गाडी देखेपछि उनी कराइहाले। ठेकेदारसँग पनि बाझाबाझ जस्तै भयो।

उपेन्द्र भन्छन्, “यसपटकमात्र होइन यसअघिसमेत ऊ गाउँ आएका बेला सबैको हालखबर लिन्थ्यो, सामाजिक काममा सधैँ अघि सथ्र्यो।”

प्रहरीले दुर्घटना भएको बताइरहे पनि परिवारले पत्याउन सकेको छैन। खोलामा भइरहेको अवैध उत्खनन्को विरोध गरेपछि ओमप्रकाशको हत्या भएको उनीहरुको दाबी छ।

ओमप्रकाश हत्या भएको भन्दै त्यसको विरोधमा स्थानीयले अवरुद्ध गरेको पूर्वपश्चिम राजमार्ग खुलाउन प्रहरीले १० राउण्ड अश्रुग्यास प्रहार गर्नु परेको थियो । परिवारका सदस्यले शुक्रबार साँझमात्र शव बुझेका छन् ।

यता ठक्कर दिएको भनिएको ना ७ ख ६४३१ नम्बरको टिप्पर चालक मुनिन्द्र महतोलाई प्रहरीले पक्राउ गरेको छ।