सवारी चालकलाई ट्राफिक पत्र, ‘तपाईंका कमजोरी एक हप्तामा सुधार गर्नुहोला’

काठमाडौं– उपत्यकामा चल्ने सार्वजनिक सवारी साधनलाई सुरक्षित, मर्यादित र यात्रुमैत्री बनाउने उद्देश्यले महानगरीय ट्राफिक महाशाखाले चालेको अभियान अन्तर्गत चालकलाई प्रतिवद्धता पत्र बाँड्न थालिएको छ।

हालै गठन गरिएको सर्वपक्षीय अगुनमन समितिले शुक्रबार सवारी साधनमा छड्के अनुगमन गर्दै सवारी साधन र चालकमा देखिएका समस्या समाधानका लागि चालकलाई प्रतिवद्धता पत्र बाँडेको हो।

अनुगमनका क्रममा अधिकांश सवारी साधनले क्षमता भन्दा बढी यात्रु बोकेको, ढोका खुल्ला गरेर गाडी चलाएको, सवारी साधन सरसफाइ नगरेकोे, यात्रुसँग राम्रो व्यवहार नगरेको, तीव्र गतिमा सवारी साधन चलाएको, चालकले सवारी चलाउँदै मोवाइलमा कुरा गरेको पाइएको थियो।

त्यसपछि सार्वजनिक सवारी साधनलाई व्यवस्थित गर्ने बारेमा गत पुस २० गते यातायात व्यवसायी, मजदुरका प्रतिनिधि र प्रहरीका बीचमा १९ बुँदे सहमति भएको थियो ।

उक्त प्रतिबद्वता कार्यान्वयन भए नभएको बारे अनुगमन गरिएको ट्राफिक महाशाखाका प्रमुख एसएसपी भीम प्रसाद ढकालले जानकारी दिए।

ढकालकाअनुसार अनुगमन समितिका पदाधिकारी सवारी साधन भित्र छिर्छन्। “सुरुमा १९ बँुदे प्रतिवद्धता पत्र पढेर यात्रुलाई सुनाईन्छ र त्यो कार्यान्वयन भए नभएको हेरिन्छ,” ढकालले भने, “त्यसपछि कार्यान्वयन गर्न बाँकी बुँदामा टिक लगाएर चालकलाई संबोधन गर्दै पत्र बुझाइन्छ।”

त्यसपछि चालकले ती बुँदामा सुधार गरेर एक हप्ताभित्र ट्राफिक प्रहरीलाई जानकारी दिनुपर्ने हुन्छ।

अहिले १५ सदस्यीय अनुगमन समितिले उपत्यका बिभिन्न स्थानमा छड्के जाँच गरिरहेको महाशाखाले जनाएको छ।