काठमाडौं– रौतहटका तीन छुट्टाछुट्टै स्थानमा ट्याक्टरको ठक्करबाट तीन जनाको ज्यान गएको छ।
गौर चन्द्रपुर सडकखण्डको शुकदेव चोकमा बिहीबार राति ना५त ९२६७ नम्बरको ट्याक्टरले ना४८प ५७६ नम्बरको मोटरसाइकललाई ठक्कर दिँदा मोटरसाइकलमा पछाडि बसेका माधवनारायण नगरपालिका–६, माधोपुरका ४५ वर्षीय रामअधार ठाकुरको ज्यान गएको प्रहरीले जनाएको छ।
ठक्करबाट गम्भीर घाइते सोही ठाउँका मोटरसाइकल चालक २२ वर्षीय सुशील ठाकुरको वीरगन्जस्थित तराई अस्पतालमा उपचार भइरहेको इलाका प्रहरी कार्यालय, गरुडाका प्रहरी नायब उपरीक्षक ज्ञानकुमार महतोले जानकारी दिए। ठक्कर दिने टयाक्टर चालक सन्तोष साह प्रहरी नियन्त्रणमा छन्।
बिहीबार राति नै वृन्दावन नगरपालिका–७ धमौरास्थित गौर–चपुर सडकखण्डमा आलु लोडगरी हर्षाहातर्फ गइरहेको ना७च ६१६९ नम्बरको ट्याक्टरको ठक्करबाट देवाही गोनाही नगरपालिका–४ का वर्ष ३५ की मिरादेवीको ज्यान गएको छ।
ठक्करबाट गम्भीर भएकी पैदलयात्रु मिरादेवीको उपचारको क्रममा सिटी अस्पतालमा ज्यान गएको प्रहरीले जनाएको छ।
ठक्कर दिने टयाक्टर चालक बाराको पचरौता नगरपालिका–४ का २८ वर्षीय गुडु यादवलाई इलाका प्रहरी कार्यालय, गरुडाले नियन्त्रणमा लिएको छ।
यस्तै, कटहरिया नगरपालिका–९ डुमरियास्थित बाबा बैजुनाथ सुगर एण्ड केमिकल इन्ड्रस्ट्रिजमा उखु लिएर गएको ना१त ४१४० नम्बरको ट्याक्टरले किचेर अन्दाजी ३५ वर्षीय एक जनाको ज्यान गएको छ। मृतकको पहिचान खुल्न नसकेको प्रहरीले जनाएको छ।