काठमाडौं– नेपाली कांग्रेसका सभापति शेरबहादुर देउवाले काठमाडौंमा उपलब्ध जिल्ला सभापतिहरुलाई आफ्नो निवास बूढानीलकण्ठमा 'चिया खान' बोलाएका छन्।
संस्थापन इतर समूहको अगुवाइमा जिल्ला सभापतिहरु तीन दिनदेखि पार्टी कार्यालयमा छलफलमा जुटेका बेला देउवाले सभापतिहरुलाई बिहीबार बिहान आफ्नो निवास बूढानीलकण्ठमा बोलाएका हुन्।
कांग्रेस पार्टी कार्यालयका मुख्य सचिव कृष्णप्रसाद पौडेलले देउवाले जिल्ला सभापतिहरुलाई बिहान १० बजे निवासमा बोलाएको बताए।
संस्थापन इतर पक्षले पार्टीमा उत्पन्न पछिल्लो विवादबारे आफू निकटका जिल्ला सभापतिसँग पराशर्म गर्न भेला बाेलाएकाे थियाे, जसमा संस्थापन इतर समूहका ४३ जिल्लाका जिल्ला सभापतिहरुको सहभागिता थियो।
देउवासँगको भेटका क्रममा जिल्ला सभापतिहरुले सानेपा भेलाबाट जारी हुने घोषणापत्र हस्तान्तरण गर्ने कार्यक्रम रहेको एक जिल्ला सभापतिले जानकारी दिए।
सहमतिबिनै संस्थापन पक्षले पुस ११ गतेको केन्द्रीय समिति बैठकबाट बहुमतका आधारमा महाधिवेशनको कार्यतालिकासहित विभिन्न सांगठनिक विषयमा निर्णय लिएपछि असन्तुष्ट पक्षले जिल्ला सभापतिहरुको भेला बोलाएको हो।