काठमाडौं - सञ्चार तथा सूचना प्रविधिमन्त्री गोकुल बास्कोटाले अहिलेको पत्रकारिता देख्दा आफूलाई राजीनामा दिएर बस्ने झोक चल्ने गरेको बताएका छन्।
नेपाल पत्रकार महासंघ भक्तपुर शाखाको २३ औं स्थापना दिवस समारोहलाई सम्बोधन गर्दै मन्त्री बास्कोटाले मिडियाका सामग्री हेर्दा आफूलाई मिडियासँग बोल्न नै मन पर्न छाडेको बताए। 'मिडियाको समाचार प्रस्तुति प्रवृत्ति देख्दा मलाई मन्त्रीबाटै राजीनामा दिएर बस्ने झोक चल्छ', उनले भने, ‘म पनि वर्षौंसम्म पत्रकारिता गरेकै मान्छे हुँ, पत्रकारको मर्म मैले बुझ्न सक्छु, पत्रकारिता पनि आचारसंहितामा रहेर गर्नुपर्छ।'
मन्त्री बास्कोटाले सरकारका कारण प्रेस स्वतन्त्रतामाथि कुनै खतरा नरहेको दाबी गरे। उनले प्रेस स्वतन्त्रतामाथि खतरा आए त्यसविरुद्ध आफू पनि लड्नेसमेत भन्न भ्याए। पत्रकारको हकभन्दा बाहिर गएर मिडिया काउन्सिल विधेयक पारित नहुनेमा ढुक्क हुन उनले सञ्चारकर्मीलाई आग्रह गरे।