काठमाडौं - एपीएफले न्यु डायमन्ड खुला महिला भलिबलमा विजयी सुरुवात गरेको छ। पोखराको टप्स माविमाथि ३–० को सोझो सेटमा जित निकाल्दै एपीएफले सुखद सुरुवात गरेको हो।
एपीएफले पहिलो सेट २५–११ ले जितेको थियो। दोस्रो सेटमा २५–१० जित निकालेको एपीएफले तेस्रो सेट २५–६ ले जित्यो।
समूह ‘ए’मा रहेको एपीएफल दोस्रो खेल पारा माउन्टसँग खेल्नेछ। समूह ‘ए’ मा एपीएफसहित टप्स मावि त्रिभुवन आर्मी र पारा माउन्ट छ। समूह ‘बी’ मा न्यु डायमन्ड स्पोर्टस् क्लबसहित ढोरपाटन स्पोर्टस् क्लब र नेपाल पुलिस क्लब छन्।
प्रतियोगिताको विजेताले ४ लाख १ हजार १ रुपैयाँ पुरस्कार पाउनेछ। दोस्रो हुने टोलीले ३ लाख १ हजार १ सय, तेस्रो हुनेले १ लाख ५१ हजार १ सय १ रुपैयाँ तथा चौथो हुनेले ५१ हजार १ सय १ रुपैयाँ पाउनेछन् ।
सर्वोत्कृष्ट खेलाडीले २१ हजार १ सय १ रुपैयाँ पाउनेछन् । त्यस्तै व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयाँ पाउने आयोजकले जनाएको छ।