एजेन्सी– इन्डोनेसियाको उत्तरपश्चिमी क्षेत्रमा मंंगलबार ६.२ म्याग्निच्युडको भूकम्प आएको छ । शक्तिशाली भूकम्प आए पनि कुनै क्षतिको विवरण प्राप्त भइनसकेको र सुनामी चेतावनीको कुनै सूचना जारी नगरिएको अधिकारीहरुले जनाएका छन् ।
अमेरिकी भूगर्भ विभागका अनुसार सुमात्रादेखि पश्चिमतर्फ पर्ने सिमेउलु टापुमा केन्द्रविन्दु भएर भूकम्प आएको हो । इन्डोनेसियाली मौसम तथा भूभौतिक विभागले पनि सुनामीको चेतावनी नरहेको स्पष्ट पारेको समाचारमा जनाइएको छ ।
भूकम्पपछि स्थानीय वासिन्दा त्रसित भएका छन् भने भूकम्पको झट्का महसुस गर्ने वित्तिकै स्थानीयवासी घरबाहिर दौडिएका थिए ।
इन्डोनेसियामा यस्ता भूकम्प, ज्वालामुखी र आँधी बेला बेलामा आइरहने गरेको छ । यसअघि सन् २०१८ मा सुलावेसी टापूमा आएको ७.५ म्याग्निच्युडको भूकम्प र सुनामीका कारण २२ सय भन्दा बढीको मृत्यु भएको थियो भने एक हजारभन्दा बढी बेपत्ता भएका घोषणा गरिएको थियो ।