अवैध रुपमा नेपाल प्रवेश गर्ने भुटानी र तिब्बती नागरिक पक्राउ

जनकपुरधाम– अवैध रुपमा नेपाल प्रवेश गर्न खोज्ने चारजना भुटानी र एकजना तिब्बती नागरिक पक्राउ परेका छन् । सशस्त्र प्रहरीको टोलीले उनीहरुलाई वीरगन्ज नाकाबाट पक्राउ गरेको हो ।

पक्राउ पर्नेमा भुटानी नागरिक १९ वर्षीया चुन्डु लाम्हो, ४३ वर्षीय चोडेन तामाङ, ७० वर्षीय ज्ञानबहादुर तामाङ, ६५ वर्षीय डोल्मा तामाङ र तिब्बती नागरिक ४० वर्षीय कुनचोक ट्सोमो रहेको प्रहरीले जनाएको छ ।

भारतको बोधगया पटना हुँदै काठमाडौं जाँदै गरेको बा ५ ख २३८८ नम्बरको ‘नेपाल–भारत मैत्री सेवा’ बसबाट उनीहरु पक्राउ परेका हुन् । वीरगन्ज नाकामा सशस्त्र प्रहरीले चेकजाँच गर्ने क्रममा पासपोर्ट र भिसा नभएका चारजना भुटानी र एकजना तिब्बती नागरिकलाई नियन्त्रणमा लिइएको जनाएको छ ।

परिचयपत्र रहे पनि पासपोर्ट र भिसा नरहेकोले उनीहरुलाई नियन्त्रणमा लिइएको सशस्त्र प्रहरी नायब उपरीक्षक अमर खत्रीले जानकारी दिए । पक्राउ परेका पाँचै जनालाई सशस्त्र प्रहरीले वीरगंज नाकास्थित अध्यागमन कार्यालयमा बुझाएको छ ।

वीरगन्जस्थित अध्यागमन कार्यालले पक्राउ परेका सबैलाई आवश्यक अनुसन्धान र कारबाहीको लागि अध्यागमन विभाग पठाइने बताएको छ ।