छुट्टाछुट्टै दुर्घटनामा तीनको मृत्यु

काठमाडौं– देशभर सोमबार भएका छुट्टाछुट्टै दुर्घटनामा तीनको ज्यान गएको छ।

ट्राफिक प्रहरीका अनुसार ओखलढुंगा, चितवन र सप्तरीमा भएका तीन दुर्घटनामा तीन जनाले ज्यान गुमाएका हुन्।

ओखलढुंगाको सुनकोशी गाउँपालिका–३ मा सोमबार राति मोटरसाइकल दुर्घटना हुँदा चालकको घटनास्थलमै मृत्यु भएको छ। दुर्घटनामा स्थानीय ४५ वर्षीय शेरबहादुर मगरको मृत्यु भएको प्रहरीले जनाएको छ। दुर्घटनामा मोटरसाइकलमा सवार व्यक्ति भने घाइते भएका छन्।

यस्तै, चितवनको रत्ननगर नगरपालिका–४, देबैलीमा सोमबार राति रोकिएको मिनीट्रकमा मोटरसाइकल ठोक्किँदा एक जनाको ज्यान गएको छ। मृतकको सनाखत भने हुन सकेको छैन। दुर्घटनामा गम्भीर घाइते २९ वर्षीय युवकको उपचारका क्रममा अस्पतालमा ज्यान गएको प्रहरीले जनाएको छ।

सप्तरीको बलानबिहुल गाउँपालिका–२ झिझहा टोलमा सोमबार बेलुकी मोटरसाइकलको ठक्करबाट साइकलयात्रीको मृत्यु भएको छ। ज्यान गुमाउनेमा सुरुंगा नगरपालिका–१०, थलाहाका ३५ वर्षीय फुर्तिला मुखिया रहेको प्रहरीले जनाएको छ।