वर्षाले पनि रोकिएन अस्ट्रेलियाको भयावह डढेलाे

साढे तीन महिनादेखि भीषण डढेलाेको सामना गर्दै आएको अस्ट्रेलियमा वर्षा भएको छ। तर, वर्षाले पनि डढेलाे कम नभएको अन्तर्राष्ट्रिय सञ्चारमाध्यमले जनाएका छन् ।

आइतवार र सोमवार भएको वर्षाका कारण केही राहत महसुस गरिए पनि आगलागी नियन्त्रणमा आउने सम्भावना कम रहेको अधिकारीले चेतावनी दिएका छन् । अस्ट्रेलियाको सिड्नी, मेलबर्नसहितका पूर्वी तटीय क्षेत्रमा वर्षा भएको छ ।

वर्षाका कारण केही समयदेखि लगातार बढिरहेको तापक्रमका कारण कष्टकर बनेको दैनिकीमा भने सामान्य राहत महसुस गरिएको छ । वर्षाका कारण अस्ट्रेलियाको तापक्रम केही घटेको छ । अस्ट्रेलियामा पछिल्ला दिनमा औसत ४४ डिग्री तापक्रम रहेको थियो ।

तीव्र गतिको हावा र बढ्दो तापक्रमका कारण गत सेप्टेम्बरदेखि फैलिएको डढेलोले अस्ट्रेलियामा संकट सिर्जना गरेको छ ।

अहिलेसम्म अस्ट्रेलियामा लागेको डढेलाेमा परेर ५० करोड बढि पशु पक्षी मरेका छन् भने २५ जना मानिसको जलेर मृत्यु भएको छ । लाखौं हेक्टर जमिको खेति नष्ट भएको छ भने करिब २ हजार घरहरु जलेका छन् ।