काठमाडौं- पश्चिमी वायुको प्रभावका कारण देशका अधिकांश स्थानको मौसम बद्लिनुका साथै चिसो बढेको छ ।
इरान र अफगानिस्तान हुँदै जम्मु-कश्मीरमा विकसित भएर नेपाल छिरेको पश्चिमी न्युन चापीय प्रणालीका कारण आज (मंगलबार) काठमाडौं उपत्यकादेखि पश्चिमका भू-भागमा वर्षा र हिमपात हुँदैछ ।
पश्चिमी क्षेत्रका उच्च पहाडी र हिमाली भूभागमा हिमपात तथा पश्चिमी पहाडी भूभागमा वर्षाको सम्भावना रहेको जल तथा मौसम पुर्वानुमान महाशाखाले जनाएको छ ।
यस्तै भोलि (बुधबार) काठमाडौं उपत्यकासहित देशका पूर्वी क्षेत्रमा वर्षा र हिमपातको सम्भावना रहेको मौसमविद्हरुले बताएका छन् । भोलि पूर्वी तराई र पहाडी जिल्लामा वर्षा हुने मौसमविद् समिर श्रेष्ठले जानकारी दिए । उच्च पहाडी र हिमाली क्षेत्रमा भने हिमपात हुने उनले बताए ।
वर्षा र हिमपातसँगै चिसो अझै बढ्ने मौसमविद्हरुले बताएका छन् । आज काठमाडौं उपत्यकाको न्यूनतम तापक्रम १ दशमलव ६ डिग्री छ भने जुम्लाको तापक्रम माइनस ५ डिग्री छ ।
यो प्रणाली शुक्रबार सम्मनै रहनेछ। शनिबारबाट मौसममा सुधार आउने महाशाखाले जनाएको छ ।