तनहुँ– तनहुँमा चितुवाको आक्रमणबाट फेरि एक बालकको ज्यान गएको छ।
जिल्ला प्रहरी कार्यालय, तनहुँका अनुसार आँबुखैरेनी गाउँपालिका–१, खरानी गाउँका ८ वर्षीय पुजन सिंजाली मगरको चितुवाको आक्रमणबाट ज्यान गएको हो। घर नजिक रहेको मामा घरबाट फर्कदै गरेको अवस्थामा बालकलाई चितुवाले आक्रमण गरेको प्रहरीले जनाएको छ।
प्रहरीका अनुसार लामो समयसम्म घर नफर्किएका बालकलाई परिवारजनले खोजी गरेका थिए। त्यसक्रममा घरदेखि पूर्व करिब २०० मिटर भीरमा बालक मृतावस्थामा फेला परेको प्रहरीले जनाएको छ।
पछिल्लो समय तनहुँमा चितुवा आतंक बढेको छ। जिल्लामा चितुवाको आक्रमणबाट हालसम्म सात बालबालिकाले ज्यान गुमाएको डिभिजन वन कार्यालयले जनाएको छ।