शनिबार, चैत १५, २०७६

समाचार

कञ्चनपुरका भण्डारी दम्पतीको हत्या आफ्नै छोराबाट

कञ्चनपुरका भण्डारी दम्पतीको हत्या आफ्नै छोराबाट

कञ्चनपुर- गत फागुन १५ गते शुक्लाफाँटा नगरपालिकाको कलुवापुरमा भएको भण्डारी दम्पती हत्यामा आफ्नै छोराको संलग्नता रहेको खुलेको छ।

जयलाल भण्डारी र उनकी पत्नी धनाको हत्या जयलालको जेठो पत्नीतिरको छोरा २६ वर्षीय भरत भण्डारीले गरेको खुलेको कञ्चनपुर प्रहरीले जनाएको छ।

‘अंशको विषयमा विवाद भएपछि भरतले बाबुआमाको हत्या गरेको अनुसन्धानबाट खुलेको छ,’ कञ्चनपुरका प्रहरी प्रमुख प्रहरी उपरीक्षक मुकुन्द मरासिनीले भने, ‘पहिलो पत्नीको मृत्यु भएपछि जयलालले कान्छी बिहे गरेपछि बावु आमा र छोराहरु अलग बस्दै आएका रहेछन्।’

मरासिनीका अनुसार घटनास्थलमा भेटिएको मोवाइलको हेडफोनले नै प्रहरीलाई हत्यारा पत्ता लगाउन मद्दत गरेको छ। धनादेवीको शव भेटिएको भान्सामा फेला परेको हेडफोन र भरतले प्रयोग गर्ने मोवाइल एउटै कम्पनीको रहेको मरासिनीले जानकारी दिए।

मरासिनीका अनुसार भरत डडेल्धुराको जोेगेनामा बस्दै आएका थिए। प्रहरीलाई भरतले दिएको बयानअनुसार उनी मोटरसाइकलको ट्रायल परीक्षा दिन फागुन १३ गते महेन्द्रनगर पुगे।

१४ गते परीक्षा दिएर डडेलधुरा हिँडेका उनी त्यो दिन अत्तरीयामै बसे। अत्तरीयाबाट फर्केर उनी राति साढे ८ बजे कलुवापुर पुगे।

उनी घरमा पुग्दा आमा भान्छामा र बुबा सुतिसकेका थिए। आमासँग अंशको विषयमा विवाद भएपछि उनले मसला पिस्ने लोहोरोले पछाडिबाट आमालाई हिर्काए। आमाले प्रतिकारसमेत गरिन्। भरतले भान्छामै भएको हसिया प्रहार गरेर धनाको हत्या गरे।

आमाको हत्या पश्चात निदाइरहेकै अवस्थामा हसियाले नै प्रहार गरेर बुबाको हत्या गरेको उनले प्रहरीसमक्ष बयान दिएका छन्।

भरत आइतबार डडेल्धुराबाट पक्राउ परेका थिए। यसअघि २०७३ मा जयलालले भरतलाई खुकुरी प्रहार गरेपछि भरतले जयलालविरुद्ध ज्यान मार्ने उद्योगमा मुद्दासमेत दिएका थिए।

भरत ३ वर्ष वैदेशिक रोजगारीमा बसेर नेपाल फर्किएको बुझिएको छ। जयलालको जेठो पत्नीतर्फका दुई छोरामध्ये भरत जेठो हुन्। जयलालले जेठी पत्नीको स्तन क्यान्सरबाट मृत्यु भएपछि दुई वर्षअघि धनासँग विवाह गरेका थिए।

बाबुआमाको हत्यापछि धनाको शवसँगै सात महिनाकी छोरी बेहोस अवस्थामा फेला परेकी थिइन्। उनको धनगढीस्थित माया मेट्रो अस्पतालमा उपचार भैरहेको छ। जयलालको उमेर ५२ वर्ष र धनाको उमेर २२ वर्ष हो।

प्रतिक्रिया दिनुहोस्