काठमाडौं– स्पेनिस ला लिगा फुटबलमा बार्सिलोनाले अंकतालिकामा पुछारमा रहेको स्पानियोलसँग बराबरी खेलेको छ।
शनिबार राति भएको खेलमा बार्सिलोनाले स्पानियोलसँग २–२ को बराबरी खेलेको हो।
खेलको २३ औं मिनेटमा घरेलु टोली स्पानियोलले डभिड लोपेजको गोलमा अग्रता लिएको थियो। तर, खेलको ५० औं मिनेटमा बार्सिलोनाले गोल फर्कायो। बार्सिलोनाका लागि लुईस स्वारेजले बराबरी गोल गरे। त्यसको ९ मिनेटपछि अर्टुरो भिडालले गोल गर्दै बार्सिलोनालाई २–१ को स्थितिमा पुर्याए। तर, खेल सकिन दुई मिनेटअघि घरेलु टोलीले बराबरी गोल फर्कायो।
बराबरीसँगै १ अंक बटुलेको बार्सिलोना ४० अंकसहित अंकतालिकामा शीर्ष स्थानमा उक्लिएको छ। समान अंक हासिल गरेको रियल मड्रिड दोस्रो स्थानमा छ। बार्सिलोनाले गोल अन्तरका आधारमा शीर्ष स्थान हासिल गरेको हो।
स्पानियोल भने ११ अंकसहित तालिकाको पुछारमा छ।