सप्तरी– राष्ट्रियसभा सांसद पदका लागि एकै परिवारका दुई दाजुभाइबीच प्रतिस्पर्धा हुने भएको छ।
सप्तरीको बोदेबर्साइन नगरपालिकाका अनिरुद्र सिंह यादव र उनका भाइ मृगेन्द्र सिंह यादवबीच प्रतिस्पर्धा हुन लागेको हो।
मृगेन्द्र राष्ट्रिय जनता पार्टी (राजपा) नेपालबाट र अनिरुद्र समाजवादी पार्टी, नेपालबाट प्रतिस्पर्धा गर्न लागेका हुन्। दुवैले आइतबार उम्मेदवार दर्ता गराउँदै छन्।
राष्ट्रियसभामा रिक्त हुन लागेका सांसद् पदका लागि आगामी माघ ९ गते निर्वाचन हुँदैछ। राष्ट्रियसभामा दुई वर्षे कार्यकाल अवधि पूरा गर्न लागेका १९ सांसद्को आगामी फागुन २० गते कार्यकाल सकिँदैछ। जसमध्ये १८ सांसद् पदका लागि निर्वाचन हुन लागेको हो। १ सांसद् भने सरकारको सिफारिसमा राष्ट्रपतिले मनोनित गर्ने संवैधानिक व्यवस्था छ।
५९ सदस्यीय राष्ट्रियसभामा एक तिहाईको दुई वर्ष, अर्काे एक तिहाईको चार वर्ष र बाँकी एक तिहाईको ६ वर्ष कार्यकाल रहने व्यवस्था छ।