शनिबार, चैत १५, २०७६

समाचार

नेपाली भूमिमा सीमास्तम्भ गाडिएको भन्दै कांग्रेस नेता–कार्यकर्ताले गरे तोडफोड

नेपाली भूमिमा सीमास्तम्भ गाडिएको भन्दै कांग्रेस नेता–कार्यकर्ताले गरे तोडफोड

भीमदत्तनगर– नेपाली भूमिमा सहायक सीमास्तम्भ गाडिएको भन्दै नेपाली कांग्रेसका नेता तथा कार्यकर्ताले शनिबार बेल्डाँडी गाउँपालिकामा सीमा स्तम्भ तोडफोड गरेका छन्।

सशस्त्र प्रहरी बल ३५ नं गणका गणपति सशस्त्र प्रहरी उपरीक्षक वीरसिंह साहुले कांग्रेस नेता तथा कार्यकर्ताले बेल्डाँडी गाउँपालिका–३, वैवाहमा निर्माण गरेको सहायक सीमास्तम्भ तोडफोड गरेको बताएका छन्।

“कांग्रेस कार्यकर्ताले शनिबार नेपाली भूमिमा सीमास्तम्भ गाडिएको भन्दै तोडफोड गरेका छन्,” उनले भने, “सो सीमास्तम्भ जोर–बिजोरका आधारमा नेपाली पक्षले निर्माण गरेको थियो।”

तत्कालीन संविधानसभाका पूर्वसदस्य बहादुर सिंह थापा, दिवान विष्ट र कांग्रेस जिल्ला कार्यसमितिका पदाधिकारी सीमास्तम्भ गाडिएको क्षेत्रमा पुगेका थिए।

सशस्त्र प्रहरी उपरीक्षक साहुले दक्षिण क्षेत्रमा केही दिनयताकाे सीमा विवादले सर्भे टोलीलाई काम गर्न असहज भइरहेको बताए।

केही महिनाअघि सीमावर्ती भारतीय बजार वनवासामा बसेको संयुक्त सीमा सर्भे टोलीले कैलालीको खग्रौलादेखि कञ्चनपुरको ब्रह्मदेवसम्मको सीमास्तम्भ पुनःनिर्माणदेखि व्यवस्थापन गर्ने निर्णय गरेको थियो।

रासस

प्रतिक्रिया दिनुहोस्