फोहोरमैला प्रशोधन केन्द्रका लागि धनगढीले टुङ्गो लगायो स्थान

धनगढी - धनगढी उपमहानगरपालिकाले एकीकृत फोहोरमैला प्रशोधन केन्द्रका लागि जमिन पाएको छ। विगत साढे २ वर्षदेखि केन्द्रका लागि उपयुक्त जमिनको खोजी थालेको उपमहानगरपालिकाले वडा नम्बर ७ को पटेला जंगलका उक्त स्थान पाएको हो।

धनगढी उपमहानगरपालिकाले गत वर्ष नै वडा नम्बर २ मा केन्द्र स्थापना गर्ने तयारी थालेपनि स्थानीयले विरोध गरेपछि उक्त योजना अलपत्र परेको थियो। अब भने पटेलाको जंगलमा केन्द्र स्थापनाका लागि स्थानीयले समेत सहमति जनाइसकेका सो वडाका अध्यक्ष सिताराम रानाले जानकारी दिए। केन्द्र स्थापनापछि सो का लागि आवश्यक पर्ने कर्मचारीका लागि स्थानीयलाई नै पहिलो प्राथमिकता दिने सहमति समेत बनेको अध्यक्ष रानाले बताए।

यसैबीच भिमदत्त नगरपालिकालेपनि केन्द्र स्थापनाका लागि जमिनको टुङ्गो लगाएको छ। नगरपालिकाको प्राविधिक प्रस्ताव समेत पठाइसकेको छ। गोदावरी र शुक्लाफाँटा नगरपालिकाले भने जमिनको टुङ्गो लगाई जग्गा प्राप्तीको प्रकृयामा गइसकेका क्षेत्रीय सहरी विकास आयोजनाका उपब्यवस्थापक श्यामचन्द्र बुढाथोकीले जानकारी दिए। उनले जमिन उपलब्ध नहुँदा सुदूरपश्चिमका ४ वटा नगरपालिकमा सञ्चालन हुने एकीकृत फोहोरमैला प्रशोधन केन्द्रको काम अगाडि बढ्न नसेकेकोमा अब द्रूत गतिमा काम अघि बढ्ने दाबी गरे।

साढे दुई वर्ष अघिदेखि कैलालीको धनगढी उपमहानगरपालिका र गोदावरी नगरपालिका, कञ्चनपुरको शुक्लाफाँटा नगरपालिका र भीमदत्त नगरपालिकामा झण्डै ११ अर्बको लगानीसहितको क्षेत्रीय शहरी विकास आयोजना लागू भएको थियो। आयोजना अन्तरगत धनगढी उपमहानगरपालिकामा साढे १० किलोमिटर, गोदावरी नगरपालिकामा १५ किलोमिटर र शुक्लाफाँटा नगरपालिकामा ४ किलोमिटर अत्याधुनिक सडक निर्माणका लागि टेन्डर भइसकेको छ।