काठमाडौं- चिनी मिल सञ्चालकसमेत रहेका नेपाली कांग्रेसका एकजना प्रदेश सांसदलाई उखु किसानको भुक्तानी तत्काल दिन पार्टीले निर्देशन जारी गरेको छ।
प्रदेश नं. ५ को कांग्रेस संसदीय दलका नेतासमेत रहेका चिनी मिल सञ्चालक विरेन्द्र कनौडियालाई किसानहरुका बक्यौता रकम तत्काल दिन पार्टीले निर्देशन जारी गरेको हो।
कांग्रेस प्रवक्ता विश्वप्रकाश शर्माले ट्वीरमार्फत् यसको जानकारी गराएका छन्।
शुक्रबार कांग्रेसले सार्वजनिक सूचनामार्फत् सांसद कनौडियालाई पुस २५ गतेभित्र उखु किसानको बाँकी रकम भुक्तानी गर्न निर्देशन दिएको हो।
उखु किसानलाई भुक्तानी दिइएको जानकारी केन्द्रीय कार्यालयलाई जानकारी गराउनसमेत निर्देशन गरिएको छ।
प्रवक्ता शर्माले ट्वीटरमा लेखेका छन्, ‘ श्री विरेन्द्र कनौडिया, सांसद, प्रदेश–५, उखु किसानलाई पुस २५ भित्र रकम भुक्तानी गरेर सो को जानकारी केन्द्रीय कार्यालयलाई गराउनु हुन, यहाँलाई सार्वजनिक सूचना जारी गरिएको छ।’
साथै उक्त ट्वीटमा प्रवक्ता शर्माले अन्य सबै उद्योगीमार्फत् किसानलाई भुक्तानी तत्काल दिलाउन प्रधानमन्त्री केपी शर्मा ओलीसमक्ष अपिल गरेका छन्।
कांग्रेसको बिहीबार बसेको केन्द्रीय कार्य समिति बैठकले पनि यसबारे गम्भीर ध्यानाकर्षण भएको जनाउँदै उखु किसानलाई तत्काल भूक्तानी दिन सम्बन्धित सबै चिनी मिल सञ्चालकहरुलाई आग्रह गरेको थियो।
श्री विरेन्द्र कनौडिया,सांसद,प्रदेश ५…
— Bishwa Prakash शर्मा (@bishwaprakash77) January 3, 2020
उखु किसानलाई पुस २५ भित्र रकम भुक्तानी गरेर सो को जानकारी केन्द्रीय कार्यालयलाई गराउनु हुन, यहाँलाई सार्वजनिक सूचना जारी गरिएको छ l
अन्य सबै उधोगि मार्फत किसानलाई भुक्तानी
तत्काल दिलाउन @PM_Nepal समक्ष अपिल छ l