चितवन छाड्न बाध्य भए एसपी मल्ल, डिएसपीलाई बुझाए चार्ज

काठमाडौं - चितवन प्रहरी प्रमुख एसपी दानबहादुर मल्लले चार्ज बुझाएर सरुवा भएको दरबन्दीका लागि रवाना लिएका छन्।

एसपी मल्लले डिएसपी एकनारायण कोइरालालाई शुक्रबार चार्ज बुझाएका हुन्। प्रहरी प्रधान कार्यालयले पुस ४ गते एसपी मल्ललाई त्रिभुवन अन्तर्राष्ट्रिय विमानस्थल सुरक्षा कार्यालयमा सरुवा गरेको थियो।

सरुवा भएको दुई हप्तासम्म पनि जिल्ला नछाडेपछि मल्ललाई १२ घण्टा भित्र सरुवा भएको स्थानमा जान प्रदेश नम्बर ३ को प्रहरी कार्यालयले बुधबार अल्टिमेटम पत्र काटेको थियो। अरु एसपीहरु सरुवा भएको स्थानमा गएर जिम्मेवारी सम्हालीसकेपनि मल्लले चितवन नछोडेपछि चर्को आलोचना भएको थियो।

मल्लको स्थानमा प्रहरी प्रधान कार्यालयले एसपी गंगा पन्तलाई सरूवा गरेको छ। मल्लले जिम्मेवारी नछोड्दा पन्त चितवन जान सकेकी छैनन्।