शनिबार, चैत २२, २०७६

समाचार

प्रदेश २ : सत्ता पक्षबाटै सरकारको आलोचना, प्रदेशलाई भेन्टिलेटरमा पुर्‍याएको आरोप

1581507371pradesh_sabha-2.jpg

जनकपुरधाम- सत्तापक्षकै सांसदहरुले प्रदेश सरकारको तीव्र आलोचना गरेका छन्।

तीन महिनापछि शुक्रबार बसेको प्रदेशसभा बैठकमा प्रदेश सरकारले जनताको भावनाअनुसार काम गर्न नसकेको भन्दै उनीहरुले सरकारको आलोचना गरेका हुन्।

गत आर्थिक वर्षको भुक्तानीसम्बन्धी विवादका कारण प्रदेशसभा बैठक अवरुद्ध हुँदै आइरहेको थियो। उपभाक्ताहरुको बक्यौता भुक्तानीबारे मुख्यमन्त्री लालबाबु राउतले जवाफ नदिएसम्म संसद चल्न नदिने अडान सत्ता र प्रतिपक्षका सांसदहरुले राखेका थिए। मुख्यमन्त्री राउत स्वयं उपस्थित भएपछि बैठक सञ्चालन भएको हो।

बैठकमा बोल्ने अधिकांश सांसदहरुले अहिले विश्वभर फैलिएको कोरोना संक्रमणको रोकथाम र बक्यौता भुक्तानीबारे प्रश्न गर्दै सरकारको आलोचना गरे।

सत्तापक्षधर राष्ट्रिय जनता पार्टी (राजपा) नेपालका प्रदेशसभा सदस्य उपेन्द्र महतोले ‘संघीयताको लागि लडेका जनताले आज मुख्यमन्त्री र मन्त्रीको पोस्टरमा जुत्ता फ्याक्ने अवस्था किन आयो’ भन्ने प्रश्न गरेका थिए। ‘एकजना संघीय सांसदले संघीयता खारेज गर्नुुपर्ने विधेयक दर्ता गराउनु भएको छ, यस्तै अवस्था रहे संघीयता धरापमा पर्ने निश्चित छ,’ महतोले भने।

मुख्यमन्त्रीसहित सरकारमा रहेका १३ जना मन्त्रीहरुको कारण प्रदेशनै ‘भेन्टिलेटर’ मा पुगिसेकेको उनको आरोप छ। ‘उपभोक्ताहरुले गत आर्थिक वर्षको भुक्तानी पाउन नसक्दा निर्वाचन क्षेत्रमा जान नसकिने अवस्था आइसक्यो,’ उनले भने, ‘तपाईँहरु कसरी क्षेत्रमा पुगेर शिलान्यास गर्न भ्याउनु भएको छ, ?’

‘मुख्यमन्त्रीज्यू भन्नु हुन्छ कर्मचारीले टेरेन,’ महतोले भने, ‘कर्मचारीले टेरेको छैन भने कुर्सीमा किन बस्नु पर्यो, कर्मचारीको बाहना बनाएर आफू जोगिने कोशिस नगर्नुस्।’ विश्वभर फैलिएको कोरोनाको सन्त्रासभन्दा प्रदेश २ का मुख्यमन्त्रीले फैलाएको भुक्तानीको त्रास बढी खतरनाक रहेको उनको भनाइ थियो।

यसैगरी राजपाकै प्रदेशसभा सदस्य सुरिता साहले पनि सरकारको कडा आलोचना गरिन्। प्रदेश सरकारले मधेश आन्दोलनको मर्म बुझ्न नसकेको उनको आरोप थियो। प्रदेश सरकारले पछिल्लो आर्थिक वर्षको भुक्तानी नगर्दा जनतासामु झुटा बन्नु परेको भन्दै साहले भनिन्, ‘कतिपय उपभोक्ताको मोटरसाइकल खोसिने अवस्था छ भने कतिपयले सहीछाप गरेर ऋण लिन बाध्य भएका छन्। के यसकै लागि जनताले संघीयता ल्याएका हुन् ?’

प्रदेश २ सरकारबाटै संघीयतालाई धरापमा पार्ने काम भइरहेको भन्दै उनले शिलन्यास र भाषणमा मात्र सीमित रहने मन्त्रीहरु जनभावनाआुनसर अघि बढ्न नसकेको आरोप लगाइन्। प्रदेश सरकारले बजेट वितरणमा भेदभाव गरेर धनुषा र महोत्तरीलाई समाप्त पार्ने षड्यन्त्र गरिरहेको समेत उनले बताइन्।

समाजवादी पार्टीका पारस साहले उपभोक्ताहरुको भुक्तानीबारे सरकारले सदनमा प्रष्ट गर्नुपर्ने बताए।

प्रतिक्रिया दिनुहोस्