काठमाडौं - शहीद स्मारक ए डिभिजन लिग फुटबल प्रतियोगितामा विभागीय क्लब एपीएफले पहिलो जित दर्ता गरेको छ। सातदोबाटोस्थित एन्फा मैदानमा बिहीबार भएको खेलमा एपीएफले सरस्वती क्लबलाई २-१ गोलले पराजित गर्यो।
एपीएफका लागि आशिष लामाले दुई गोल गरे। उनले ६३ औं र इन्ज्यूरी समयको तेस्रो मिनेटमा गोल गरे। सरस्वतीका विनोद केसीले एक गोल फर्काए। सरस्वतीले अहिलेसम्म लिगमा जित हात पारेको छैन।
एपीएफले जितसँगै तालिकामा चार अंक बनाएको छ।
बिहीबारको खेलसँगै चौथो चरणका खेलहरु सकिएका छन्। चौथो चरणसम्म आइपुग्दा मनाङ मर्स्याङ्दी क्लब १० अंकसहित शिर्ष स्थानमा रहेको छ भने मछिन्द्र दोस्रो तथा त्रिभूवन आर्मी क्लब तेस्रो स्थानमा रहेको छ।