विहीबार, चैत २०, २०७६

समाचार अर्थ

बैंकका कर्मचारीलाई संक्रामक रोग लागे ‘फोर्स लिभ’

1584079320Corona.jpg

काठमाडौं। बैंक तथा वित्तीय संस्थाका कर्मचारीहरुले आफूलाई कुनै प्रकारको संक्रामक रोग लागेमा तलब आउने गरी अनिवार्य बिदा (फोर्स लिभ) लिन पाउने भएका छन्। कोरोना भाइरस (कोभिड–१९) का कारण त्रास बढेका बेला नेपाल राष्ट्र बैंकले बैंकले यस्तो निर्देशन जारी गरेको हो।

बिहीबार राष्ट्र बैंकले जारी गरेको बैंक तथा वित्तीय संस्था कर्मचारी सेवा विनियमावलीमा यस्तो व्यवस्था छ। अब बैंक तथा वित्तीय संस्थाहरुले संक्रामक रोग लागेका कर्मचारीलाई ‘फोर्स लिभ’ दिनका लागि एक अधिकारी (कर्मचारी) नियुक्त गर्न सक्नेछन् ।

ती अधिकारीले अनिवार्य बिदा बस्न निर्देशन दिए कर्मचारी बिदामा बस्नुपर्ने र त्यस्तो कर्मचारीको बिरामी बिदा बाँकी नभएमा अन्य बिदा स्वीकृत गर्न वा वेतलबी बिदामा पठाउन सकिने नियमावलीमा व्यवस्था गरिएको छ ।

यसअघि बैंक तथा वित्तीय संस्थाका कर्मचारीलाई वार्षिक रुपमा अनिवार्य बिदा (फोर्स लिभ)को व्यवस्था थियो । केन्द्रीय बैंकले जारी गरेको नियमावलीमा कर्मचारीलाई ११ प्रकारका बिदा दिनुपर्ने व्यवस्था गरिएको छ ।

विनियमावली अनुसार बैंकहरुले कर्मचारीलाई १८ दिनको एक दिनका दरले घर बिदा, वर्षमा १२–१२ दिन बिरामी र भैपरी आउने बिदा, महिला कर्मचारीलाई सेवा अवधिमा २ पटकसम्म चौध हप्ताको मातृत्व संरक्षण बिदा र पुरुष कर्मचारीलाई श्रीमती प्रसूति भएको बेला सेवा अवधिमा दुई पटकसम्म प्रत्येक पटक पन्ध्र दिनका दरले प्रसूति स्याहार बिदा दिनुपर्नेछ ।

यसैगरी १५ दिनसम्म किरिया बिदा, ५ वर्षभन्दा बढी काम गरेका कर्मचारीलाई नोकरी अवधि भरमा साठी दिनसम्म विशेष बिदा, सेवा अवधिमा एक पटक तीन दिनको विवाह बिदा, न्यूनतम सात दिनको अनिवार्य बिदा, १० वर्ष स्थायी सेवा पूरा गरेका कर्मचारीहरुलाई बढीमा १ वर्षसम्म असाधारण बिदा, तीन वर्ष स्थायी सेवा गरेका कर्मचारीलाई ५ वर्षसम्मको अध्ययन–तालिम बिदा दिन सकिने व्यवस्था गरिएको छ ।

श्रम ऐनका व्यवस्थाहरु समेटेर राष्ट्र बैंकले बैंक तथा वित्तीय संस्थाका कर्मचारीका लागि नियमावली बनाएको हो। यसैका आधारमा बैंकहरुले नियमावली बनाएर लागू गर्नुपर्नेछ ।नियमावलीमा कर्मचारी नियुक्तिलगायत उनीहरुको सेवा शर्तबारे पनि स्पष्ट पारिएको छ ।

प्रतिक्रिया दिनुहोस्