सीमासम्बन्धी संकल्प प्रस्ताव पारित

काठमाडौं– भारतसँगको सीमा विवादबारेको संकल्प प्रस्ताव बिहीबार राष्ट्रिय सभामा पारित भएको छ।

बैठकले सीमा विवादबारेको संकल्प प्रस्ताव पारित गर्दै लिम्पियाधुरा, लिपुलेक र कालापानीमा देखिएको सीमा विवाद समाधान गर्न सरकारलाई निर्देशन दिएको हो।

सत्तारुढ नेकपा संसदीय दलका प्रमुख सचेतक खिमलाल भट्टराईको प्रस्ताव र प्रमुख प्रतिपक्षी कांग्रेससचेतक सरिता प्रसाईको समर्थनमा दर्ता भएको संकल्प प्रस्ताव छलफलपछि पारित भएको हो।

छलफलका सांसदहरुले उठाएका प्रश्नको जवाफ दिँदै परराष्ट्रमन्त्री प्रदीप ज्ञवालीले सन् २०२० भित्रै भारतसँगको सीमा विवाद सुल्झिने बताए।

उनले सीमा विवाद समाधानका लागि नेपाल सरकारले भारतलाई दुईपटक पत्र पठाइसकेको जानकारी दिए । उनले सरकार भारतसँग वार्ताको प्रतीक्षामा रहेको बताए।

मन्त्री ज्ञवालीले भारतले सीमाबारे झिकेको विवाद निरर्थक भएको टिप्पणी गरे। छलफलमा कांग्रेस सांसद राधेश्याम अधिकारीले दुई देशबीचको सीमा विवादले अरु सम्बन्धमा असर पार्न नहुने बताएका थिए।