काठमाडौं – बाजुराको हिमाली गाउँपालिका-७ धुलाचौर नजिक जिप कर्णाली नदीमा खसेको छ। गाउँपालिकाबाट कोल्टीतर्फ जाँदै गरेको से१ज १०६४ नम्बरको जिप बिहीबार दिउँसो कर्णाली नदीमा खस्दा हालसम्म चार जनाको शव भेटिएको र उद्धारकार्य जारी रहेको घटनास्थलबाट पत्रकार नहकुल जोशीले जानकारी दिएका छन्।
मृतकको सनाखत हुन सकेको छैन। दुर्घटनामा घाइते भएका चार जनाको प्रहरी र स्थानीयले उद्धार गरेका छन्। जिपमा कति यात्रु सवार थिए भन्ने खुलेकाे छैन। साँघुरो उकालो सडकबाट जिप खसेको हुन सक्ने अनुमान छ।
दुर्घटनामा परेको जिप चालकले नभएर गाडी मालिकका भाइले चलाएको स्थानीयले बताएका छन्। प्रहरीले दुर्घटनाबारे अनुसन्धान सुरु गरिएको जनाएको छ।