अंग्रेजी नयाँ वर्षमा काठमाडौंमै हिमपातको सम्भावना

काठमाडौं- काठमाडौं उपत्यकासहित देशका अधिकांश भागमा फेरि वर्षा हुने भएको छ। उच्च पहाडी र हिमाली क्षेत्रमा हिमपातको पनि सम्भावना देखिएको मौसम पूर्वानुमान महाशाखाले जनाएको छ ।

महाशाखाका अनुसार पश्चिमी वायुको प्रभावका कारण अग्रेजी नयाँ वर्षको दिन (बुधबार) वर्षा र हिमपातको सम्भावना देखिएको हो ।

देशको पश्चिमी क्षेत्रबाट वर्षा र हिमपात सुरु हुने र यो क्रम बिहीबारसम्म जारी रहने मौसमविद् गंगा नगरकोटीले जानकारी दिइन् । उनका अनुसार काठमाडौं उपत्यका आसपासका डाँडाहरुमा पनि हिमपातको सम्भावना देखिएको छ ।

पश्चिमबाट भित्रिने पश्चिमी वायु शुक्रबारमात्रै पूर्वी क्षेत्रमा पुगेर बाहिरिने मौसम पूर्वानुमान महाशाखाले जनाएको छ ।

पश्चिमी वायुको प्रभाव भोलि (मंगलबार) बाट नै देखिन सुरु गर्ने मौसमविद् नगरकोटीले बताइन्। उनका अनुसार मंगलबार मौसम धुम्म हुने र बुधबारबाट वर्षा र हिमपात हुनेछ ।

आज (सोमबार) भने पहाडी क्षेत्रमा घाम लागेको छ भने तराईका जिल्लाहरुमा बाक्लो हुस्सु र कुहिरो लागेको महाशाखाले जनाएको छ । तराईका जिल्लामा पनि बुधबार फाट्टफुट्ट वर्षा हुन सक्ने जनाइएको छ ।

वर्षा र हिमपातसँगै देशभरको तापक्रम फेरि घट्न सक्ने मौसमविद् नगरकोटीले बताइन् । मौसम पूर्वानुमान महाशाखाले चिसोबाट जोगिन अपिल पनि गरेको छ ।