काठमाडौं - नेपाली कांग्रेसका सभापति शेरबहादुर देउवाले आफ्नो कार्यकाल थप एक वर्ष लम्ब्याएका छन्। शुक्रबार वरिष्ठ नेता रामचन्द्र पौडेल र कृष्णप्रसाद सिटौला पक्षका नेताहरुको सहभागिता बिना नै बसेको केन्द्रीय कार्यसमिति बैठकबाट देउवाले फागुनमा सकिन लागेको आफ्नो चार वर्षे कार्यकाल एक वर्षका लागि थप गराउने प्रस्ताव पारित गराएका हुन्।
सभापति देउवाले शुक्रबारको बैठकबाट पार्टीको १४ औं महाधिवेशन २०७७ फागुन ७ देखि १० सम्म सम्पन्न गर्ने, विभागको संख्या बढाएर ४१ पुर्याउने र गत कात्तिकमै सकिएको तरुण दलको म्याद ६ महिना थप गर्ने निर्णयसमेत पास गराएका छन्। प्रवक्ता विश्वप्रकाश शर्माका अनुसार मंसिर २६ गतेदेखि लगातार बैठक अवरुद्ध हुन थालेपछि र असन्तुष्ट पक्षसँग सहमतिसमेत हुन नसकेपछि देउवाले बहुमतका आधारमा निर्णय गराएका हुन्।