नेकपाले सभामुख उम्मेदवार छान्‍न नसक्दा संसद् बैठक स्थगित

काठमाडौं - सत्तारूढ दल नेकपाले सभामुखका लागि उम्मेदवार टुंगो लगाउन नसक्दा प्रतिनिधिसभाको बैठक स्थगित भएको छ। कार्यतालिका अनुसार शुक्रबार उपसभामुखले राजीनामा दिएपछि सभामुख तथा उपसभामुखको निर्वाचन प्रक्रिया सुरु हुनुपर्ने थियो।

तर, नेकपाका अध्यक्ष पुष्पकमल दाहाल काठमाडौंबाहिर रहेकाले नेकपाले सभामुखका उम्मेदवारको टुंगो लगाउन सकेको छैन। आज उपसभामुख शिबमाया तुम्बाहाङ्फेले राजीनामा बुझाउने तयारी थियो। तर, सभामुख उम्मेदवारको टुंगो नलाग्दा उनले राजीनामा बुझाइनन्।

शुक्रबार एक बजेका लागि बोलाइएको बैठक संसद् सचिवालयले सूचना टाँसी बुधबार एक बजे बस्ने गरी स्थगित गरेको हो।