काठमाडौं- संसदको हिउँदे अधिवेशनको दोस्रो बैठक आज (शुक्रबार) बस्दैछ । बैठकमा सभामुख चयनको पक्रिया अगाडी बढाउने मुख्य कार्यसूची रहेको छ।
तर, सत्तारुढ नेकपा भित्रै आन्तरिक सहमति हुन नसकेकाले सभामुख चयन प्रक्रिया अलमलमा पर्ने देखिएको छ । उपसभामुख शिवमाया तुम्बाहाम्फेलाई राजीनामा गर्न लगाउने र त्यसपछि सभामुख र उपसभामुख दुबैको निर्वाचन प्रक्रिया सुरु गराउने नेकपाको तयारी थियो ।
पुस ४ गते बसेको बैठक सभामुख चयनको तयारीकै लागि भनेर एकैचोटी पुस ११ गतेका लागि डाकिएको थियो । तर, सत्तारुढ नेकपाले कुनै निर्णय नगरेको र उपसभामुखले राजीनामा पनि नगरेकाले सभामुख चयन प्रक्रिया अघि नबढ्ने संसद् सचिवालय स्रोतले जनाएको छ ।
एउटै दलको सभामुख र उपसभामुख हुन नपाउने कानुनी व्यवस्था भएसँगै नेकपाले सभामुख आफ्नो दलबाट बनाउने र उपसभामुख अन्य दलबाट बनाउने तयारी थालेको छ ।
तर नेकपाभित्रै सभामुख कसलाई बनाउने भन्ने बारेमा अध्यक्षद्वय केपी ओली र पुष्पकमल दाहालले निर्णय गरिनसकेको नेताहरुले बताएका छन् ।
बलात्कारको आरोप लागेपछि तत्कालीन सभामुख कृष्णबहादुर महराले गत असोज १८ गते राजीनामा दिएपछि सभामुख पद रिक्त छ ।