काठमाडौं- चर्चित गायक रामकृष्ण ढकालको पत्नी निलम शाहसँग सम्बन्ध विच्छेद भएको छ ।
पत्नी निलमले अदालतमा सम्बन्ध विच्छेद गरी पाऊँ भनी दिएको निवदेनअनुसार बुधबार यी दम्पतीको सम्बन्ध विच्छेद भएको हो ।
निलमले मंगलबार निवदेन दिएपछि बुधबार रामकृष्णले पनि आफू सम्बन्ध विच्छेद गर्न सहमत भएको अदालतलाई बताएका थिए।
काठमाडौं जिल्ला अदालतका श्रेस्तेदार आनन्द श्रेष्ठका अनुसार उनीहरु कानुनी रुपमा नै अलग हुन सहमत भएका हुन्। उनीहरुको छोरी आमा निलमसँगै रहने श्रेस्तेदार श्रेष्ठले बताए ।
निलमले ढकालबाट अंश नलिने अदालतसामू बताएको पनि श्रेष्ठले जानकारी दिए। लालिगुराँस सहकारीसँगको ऋणसम्बन्धि मुद्दाका कारण यो दम्पति केही समयदेखि तनावमा थियो।
घर बनाउँदा लिएको ऋणलाई लालिगुराँसले दोब्बर तेब्बर बनाएर असुल्न खोजेको भन्दै गायक ढकाल न्याय माग्दै हिडेका थिए । ऋणका कारण तनावमा रहेका उनी पत्नीसँगको डिभोर्सपछि थप तनावमा देखिएका छन् ।
उनीहरु १७ वर्षअघि विवाह बन्धनमा बाधिएका थिए ।