काठमाडौं- सोमबार काठमाडौंका विभिन्न स्थानबाट पक्राउ परेका चिनियाँ नागरिकले थुप्रै सरकारी वेबसाइटहरू ह्याक गर्नुका साथै वित्तीय ठगीको योजना बनाएको प्रहरीले आशंका गरेको छ।
प्रहरीले पर्यटक भिषामा नेपाल आएर गैरकानुनी गतिविधमा संलग्न भएको आशंकामा ९९ चिनियाँ नागरिकलाई बुढानिलकण्ठ, मनमैजु, बाँसबारीलगायत ठाउँबाट पक्राउ गरेको हो।
प्रहरी स्रोतकाअनुसार चिनियाँ नागरिकले चार सयभन्दा बढी सरकारी वेबसाइटहरू ह्याक गरेका छन्।
महानगरीय अपराध महाशाखाका प्रमुख प्रहरी वरिष्ठ उपरीक्षक सहकुल थापाले ह्याकिङ तथा कम्प्युटरको माध्यमबाट विभिन्न अपराधमा संलग्न भएको आरोपमा उनीहरुलाई पक्राउ गरेको बताए।
आरोपी चिनियाँलाई अपराध अनुसन्धान महाशाखा, प्रहरी परिसर काठमाडौं र केन्द्रीय अनुसन्धान ब्यूरोको संयुक्त टोलीले पक्राउ गरेको हो।
एकैपटक यति ठूलो संख्यामा विदेशी नागरिक पक्राउ परेको यो पहिलो पटक हो।
नेपालमा बसेर चीनमा आर्थिक अपराध गरेको, नेपालमा बैंक ह्याकिङलगायतका प्रकरणमा उनीहरुलाई पक्राउ गरेर अनुसन्धान थालिएको प्रहरी स्रोतले जनाएको छ। उनीहरुको साथबाट ठूलो परिमाणमा मोबाइल, ल्यापटपजस्ता समाग्रीसमेत बरामद गरिएको प्रहरीले जनाएको छ।
पक्राउ पर्ने ९९ जना एकै समूहका भएको र नेपाल पुगेपछि विभिन्न समूहमा बाँडिएको प्रारम्भिक अनुसन्धानबाट खुलेको प्रहरीले जनाएको छ।
‘उनीहरुको साथमा रहेको ल्यापटप तथा मोबाइलको अनुसन्धान गरिसकेपछि उनीहरु के गर्न नेपाल आएका हुन् भन्ने विस्तृत खुल्न सक्छ’ एसएसपी थापाले भने।
गत भदौ १४ गते ६ जना चिनियाँ नागरिकलाई प्रहरीले एटीएम ह्याकिङ गरेर पैसा चोरी गर्दागर्दै पक्राउ गरेको थियो।
प्रहरीले चिनियाँ नागरिक लिन जियानमेङ, लुओ जियालेइ, झु लियानगाङ, किउ युनकिङ र चेन बिनलाई सार्वजनिक गरेको थियो।
त्रिभुवन अन्तराष्ट्रिय विमानस्थलबाट भाग्न खोजेका सु लु सिङ भदौ १५ गते पक्राउ परेका थिए।
उनीहरुले नबिल बैंकको दरबार मार्गमा रहेको एटीएम, हिमालयन बैंकको ठमेलमा रहेको एटीएम र प्रभू बैंकको कमलपोखरीमा रहेको एटीएमबाट रकम निकालेका थिए।