काठमाडौँ- सुकेधारामा बसले ठक्कर दिदा घाइते भएकी छात्राको उपचारका क्रममा मृत्यु भएको छ।
पशुपति क्याम्पसमा बीबीएस चाैथाे वर्षमा अध्ययनरत २१ वर्षीय छात्रा सृष्टि पन्तको ओम अस्पतालमा उपचारका क्रमका मृत्यु भएको प्रहरीले जनाएको छ। गोरखा घर भएकी उनलाई उपचारका लागि चाहबहिलस्थित ओम अस्पतालमा लगिएको थियो।
उनलाई हिँडिरहेको अवस्थामा मध्यपुर ठिमी चल्ने बा ४ ख ५९२० नम्वरको बसले बिहान ठक्कर दिएको थियो। ठक्कर दिएर गाडी भाग्न खोजेपछि विद्यार्थीले गाडीमा तोडफोड गर्नुका साथै आगजनी गरेका छन्।
विद्यार्थीले बा ४ ख ७१०१ नम्बरको बसमा आगजनी गरेका छन् भने बा ३ ख ४४३३ नम्बरको बसमा तोडफोड गरेका प्रहरीले जनाएको छ। प्रहरी र विद्यार्थीबीच केहीबेर झडपसमेत भएको थियो।
ठक्कर दिने गाडीका चालक र आगजनीमा संलग्न अन्य दुई जनालाई नियन्त्रणमा लिइएको प्रहरीले जनाएको छ।