काठमाडौं- निर्माण सुरु हुने क्रममा रहेको निजगढ अन्तर्राष्ट्रिय विमानस्थलको रुख काट्ने काम तत्काल अगाडि नबढाउन सर्वोच्च अदालतले अन्तरिम आदेश दिएको छ।
प्रधानन्यायाधीश चोलेन्द्र शमशेर राणा र न्यायाधीश कुमार रेग्मीको संयुक्त इजलाशले विमानस्थल क्षेत्रमा पर्ने रुख काट्ने काम तत्काल अगाडि नबढाउन आइतबार अन्तरिम आदेश दिएको हो।
राष्ट्रिय गौरवको आयोजनाको रुपमा रहेको विमानस्थल निर्माणका क्रममा आवश्यकता भन्दा बढी रुख काट्न लागिएको र त्यसले वातावरणीय असर गर्ने भन्दै रञ्जु पाँडे क्षेत्री लगायतले उत्प्रेषणको माध्यमबाट अन्तरिम आदेशको माग गरी रीट दायर गरेका थिए।
गत मंसिर १७ गते दर्ता भएको रीटमा आइतबारको संयुक्त इजलाशले यस्तो आदेश दिएको हो।
रुख नकाट्न माग गर्दै अरु पनि रिट तथा निवेदनहरु परेका छन्। रुख काट्ने विषयमै यसअघि अदालतले सरकारको तर्फबाट लिखित जवाफ पेश गर्न आदेश दिएको थियो।