जनकपुरधाम– गुठी संस्थान जनकपुरले मन्दिरको जग्गा अतिक्रमण गरेर बनाइएका घर टहरा भत्काएको छ । जनकपुरधाम उपमहानगरपालिका–१२ स्थित हनुमान मन्दिर अधिनस्त जग्गा अतिक्रमण गरेर बनाइएका घरटहराहरु आइतबार गुठी संस्थानले डोजर चलाएर भत्काएको हो ।
मन्दिरका पुजारी किशोरी शरणले गुठी संस्थान जनकपुरमा अतिक्रमण गरी बनाइएका घरटहरा भत्काउन निवेदन दिएका थिए । पुजारी शरणले दिएको निवेदनको आधारमा गुठी संस्थानले आधा दर्जन घरटहराहरु भत्काएको छ ।
१५ दिने मिथिला मध्यमा परिक्रमाका सहभागी श्रद्धालुहरु हनुमान मन्दिरको जग्गामा एक रात विश्राम गर्ने गर्दछन् । धार्मिक महत्वको जग्गा अतिक्रमण हुन थालेपछि मन्दिरका पुजारीले घर टहरा हटाउन निवेदन दिएका थिए ।
गुठी संस्थान जनकपुरका निमित्त प्रमुख वैकुण्ठ रेग्मीले प्रहरीको सहयोगमा त्यहाँ निर्माण गरिएका ६ वटा घर टहरा भत्काउन लगाएका छन् । गुठी संस्थानले मन्दिरको जग्गा अतिक्रमण गरी दिनेश दास, भिलवा दास, उदय दास, बेचन दास, विल्टु यादव, रामदयाल दासलगायतले निर्माण गरेका घर टहरा भत्काएको हो ।
गुठी संस्थानका निमित्त प्रमुख रेग्मीले हनुमान मन्दिरका पुजारीले निवेदन दिएपछि घर टहरा भत्काइएको बताए । गुठीको जग्गा अतिक्रमण गरी बनाइएको अन्य घर टहराहरु समेत चाँडै भत्काइने उनको भनाइ छ ।
सरोकारबला निकायले चासो नदिँदा गुठी संस्थान अधिनस्त विघौ क्षेत्रफलको जग्गा अतिक्रमण गरी जनकपुरमा घर टहराहरु निर्माण भएका छन् । गुठी संस्थान र मन्दिरका महन्तहरुको मिलोमतोमा मन्दिरको जग्गा बेचबिखनका साथै अवैध तरिकाले अतिक्रमण हुँदै आएको आरोप लाग्ने गरेको छ ।
यसअघि गुठी संस्थान जनकपुरका निमित्त प्रमुख रहेका मनोज शर्मा निलम्बनमा परेका छन् । शर्माले जालसाजी तथा ठगी गरी गुठीको जग्गा बिक्री गरेको अभियोगमा अख्तियारले नियन्त्रणमा लिएको थियो । जालजासी तथा ठगी गरेको अभियोग लागेपछि उनी निलम्बनमा परेका हुन् ।